‘Har ezazu kontrola’ programak sare sozialak ezagutzea du ardatz

“Gurasoek eta tutoreek ikastetxeetan gehien erabiltzen diren tresna digitalak erabiltzen ikasteko joan den urrian egin ziren jardunaldien arrakastaren ondoren, beste urrats bat eman nahi dugu familien prestakuntzan. Oraingoan, eta Har ezazu kontrola hezkuntza digitaleko programari esker, smartphone-n, online jokoen eta sare sozialen erabileran jarriko da arreta”, azaldu zuten atzo Vital Fundaziotik. Eta bertako zuzendaria den Arantxa Ibañez de Opacuak honako hau adierazi zuen: “Irailetik hona antzeman da gailu horiek eta eskaintzen dituzten aukera guztiak erabiltzeko adinak jaisten ari direla, eta are gehiago, Lehen Hezkuntzako haur batzuk gehiegi erabiltzen ari direla, eta zenbait kasutan kontrolik gabe. Horrek asko kezkatzen gaitu Vital Fundazioan, batez ere Gabonak gertu ditugulako, eta garai horretan teknologia hauen erabilera biderkatu egiten delako”.

Eta, hain zuzen ere, kezka horrengatik erabaki zuten familiei irakastea eta, horregatik, gurasoei eta tutoreei zuzendutako bi prestakuntza-saio berri programatzea, mugikorrak izateko adin gomendagarriei buruz kontzientziatzeko eta presta-tzeko, baita tik tok, instagram edo facebook bezalako sare sozialak sortzeko eta online jokoetan aritzeko ere. Aurreko prestakuntza bezala, hau ere doakoa izango da interesatuentzat, eta online eta aurrez aurre jarraitu ahal izango da, familiek hala erabakitzen badute. Aurrez aurreko saioa Vital Fundazio Kulturunean egingo da (Bakea kalea 5. zenbakia, Dendarabako lehen solairua). Hala ere, bi kasuetan, saioa arratsaldeko bost eta erdietan hasiko da, ordubete inguruko iraupenarekin. Izena emateko, nahikoa da www.fundacionvital.es helbidean sartu eta urratsak jarraitzea.

“Harrigarria da gaur egun Lehen Hezkun-tzako 5. eta 6. mailako ia ikasgela guztietan ikasle askok smartphone-a, Instagram eta TikTok izatea eta 12 urtetik gorakoentzako edo 18 urtetik gorakoentzako jokoetan aritzea. Irakasleek ziurtatzen dute Lehen Hezkuntzako 3. mailan ere ikusten dituztela haurrak horrelako jolasak erabiltzen. Erabilera horri gehitzen zaio online jokoetako irainak eta mehatxuak gazte gehienek normaltzat jotzen dituztela, eta, batzuetan, ohikotzat jotzen dituzte joko bortitzak, helburu bakarra denak hiltzea eta bakarrik geratzea dutenak”, adierazi zuten aurkezpenean eta gaineratu ere: “Gero eta maizago egiten dira iruzurrak, eta Lehen Hezkuntzako 6. mailako eta DBHko 1. mailako ikasleek material pornografikoa jaso dutela onartzen dute. Gainera, konfinamenduan zehar, haur batzuk adin kontrolik gabeko serieak ikusten aritu direla egiazta daiteke”. “Sare sozialak ez dira jostailuak, tresna indartsuak dira eta, oharkabean erabilita, buruhauste ugari ekar ditzakete”, azpimarratu zuen Ibañez de Opacuak. Har ezazu kontrola izeneko programa 2019an jarri zuten abian. Hasiera batean Bigarren Hezkuntzako ikastetxeei zuzenduta, baina duela gutxi familiei, beren seme-alaben hezkuntza-ingurunea ezagutu dezaten.