Lurraldebusek zerbitzu bereziak jarriko ditu BECen ekainean egingo den Osakidetzako LEPko azterketarako

Gipuzkoako Foru Aldundiko Mugikortasuneko, Turismoko eta Lurralde Antolaketako Sailak zerbitzu bereziak antolatuko ditu Lurraldebusen ekainaren 20an eta 21ean, Barakaldoko (Bizkaia) BECen egingo den Osakidetzako lan eskaintza publikoaren azterketara doazenak Bilbora modu "eroso eta seguruan" hurbildu ahal izateko, "ibilgailu pribaturik erabili behar izan gabe".

Azahara Dominguez Mugikortasuneko, Turismoko eta Lurralde Antolaketako diputatuak zehaztu duenez, DO01 (Donostia-Zarautz-Bilbao) lineako autobusa 06:30ean irtungo da Donostiatik, Bilbora 07:45ean iristeko; behin Bilbon, metro zerbitzua hartu ahal izango da, Mugirekin ordain daitekeena, Ansioko geltokiraino, BECen egingo baitira azterketak.

"Jende asko dabilen eta oposizioak bezalako tentsio berezia dagoen uneetan, funtsezkoa da pertsona guztiak halako hitzordu garrantzitsu batera joan ahal izango direla bermatzea, erosotasun, segurtasun eta irisgarritasun baldintzetan eta arrazoizko prezioan", azaldu du.

Ildo horretan, azpimarratu du garrantzitsua dela "garraio publikoko alternatibak eskaintzea, hautagaiei Bilboraino joateko aukera emango dietenak, ibilgailu pribatu baten edo hirugarren pertsona baten mende egon gabe, edo ostatua ordaintzeko baliabide ekonomiko nahikoak izan beharrik gabe, horrela aukera berdinak sortuz".

"Beren etorkizun profesionalaren zati handi bat jokoan duten milaka pertsonaz ari gara, eta erakundeetatik gauzak errazteko ardura dugu, hain garrantzitsua den une honetan", adierazi du.

Txartelak asteazkenean jarriko dira salgai, maiatzarebn 20an, Avanzaren webgunean (http://gipuzkoa.avanzagrupo.com), autosalmentako makinetan eta leihatiletan.