Bero-bero handia egiten ari du egun hauetan Gasteizen. Termometroak 40ºC-ra iritsi dira. Jasanezina izan da. Eta ez bakarrik zeruan, hiriko kaleetan ere bai. Ehunka pertsonak lan egiteari uztea erabaki dute. Baina kasu honetan grebari eusteko erabakia ez da batere erraza izan, eskubideak zapaltzeko asmoz jasotako mota guztietako presioak eta beldurrak kontuan izanik. Bederatzi egunez enpresako ekoizpena eten ostean eta enpresaren aurrean hainbat elkarretaratze egin ondoren, kalera irten dira haserrea eta ezinegona erakusteko, bai goizean, bai arratsaldean. Baina kasu honetan oso desberdina izaten ari da. Zergatik? Gasteiz osoak iritzia eman du, herritar guztiok eman dugu gure iritzia, fabrikan lan egin gabe: kazetariok, politikariek, enpresarioek, auzokideek, dendariek,... Denok eman dugu gure iritzia lan-gatazka honi buruz. Eta langileek jasotako presioa jasanezina izan da. Baina gauza bat oso argi dago: esfortzu eta borrokari eutsiz, langile hauek dira erabakitzen duten bakarrak. Eta ez guk. Inoiz ez. Haiek jakin badakite zer gertatzen ari den fabrikako barruan, haiek jakin badakite zein izango den erabakirik onena. Haiek bakarrik erabakiko dute mobilizazioekin jarraituko duten ala ez. Eta ez guk. Denok errespetatu behar dugu Gasteizko behargin horien askatasuna.
