Ikasturte berriarekin batera, Udalaren Kirol Zerbitzuak 55 urtetik gorakoentzako ‘Ibilbideak natur inguruetan’ programari ekingo dio berriro. Udazkeneko denboraldiak 10 irteera izango ditu eta astearte eta ostegunero egingo dira, irailaren 16tik urriaren 16ra bitarte. Ibilbide bakoitzak 100 plaza izango ditu gehienez, eta izena emateko epea irailaren 4an, ostegunean, irekiko da, 08:30ean.

“Ekimen honen helburua da 55 urte baino gehiagokoek gure inguruko paisaia naturalez gozatzen duten bitartean aktibo egoteko aukera izatea eta, aldi berean, gero beste ibilbide batzuk partekatu ahal izateko beste mendizale batzuk ezagutzeko aukera ematea”, azaldu du Kirol zinegotziak, Ana López de Uraldek.  

Denboraldi berriko irteeretan hauek bisitatuko dira: Maeztu, Arnoko labirintoa eta Katarri, Okina, Urarte, Samaniego, Mañueta eta Otxate herri madarikatua, besteak beste. Ibilbideak zailtasun mailaren arabera definituta daude (baxua edo neurritsua) eta zirkularrak edo linealak dira. Haien distantzia 7 eta 11 kilometro artekoa izango da. Ostegunetako irteerak asteartekoak baino errazagoak dira eta lehen aldiz zailtasun handiagoko (ertain-altua) ibilbide bat programatu da, Andoin eta Toberako ur-jauziaren artean, irailaren 23rako, astearterako.

Izen-emateak irailaren 4ko 08:30etik aurrera egin ahal izango dira, irteera bakoitzaren aurreko eguneko 13:00ak arte gizarte-etxeen sarean eta Udalaren kirol-instalazioetan. Udaleko kirol-instalazioetako harpidedunen kasuan, prezioa 2,65 eurokoa izango da; aldiz, harpidedunak ez direnek 4,20 euro ordaindu beharko dituzte.

Kanpainak garraio-zerbitzua biltzen du eta geralekuak Iparralde eta Judimendi gizarte-etxeetan eta Gasteiz hiribideko 18. zenbakian, epaitegien parean, izango dira. Irteera 08:30ean izango da, eta iritsiera-ordua, aldiz, 14:00etan.

“Ibilbideak natur inguruetan” programa udaberrian, maiatzean eta ekainean, eta udazkenean, iraila eta urria bitartean, garatzen da. Bi denboraldietako bakoitzean 10 irteera izaten dira, eta aurtengo lehen erdian 815 pertsonak hartu dute parte, horietatik % 59 emakumeak izan dira.

Ibilbideak Udalaren webgunean kontsultatu eta deskargatu ahal izango dira.