Vitoria-Gasteizko Udalak Enrique Eguren kalean dagoen haur-parkea birmoldatzeko obrak kontratatuko dituela iragarri du. Hiriko joko eremuak modu integralean berritzeko udal-planean jasota dago proiektua, eta egungo ekipamendua kentzea (denboraren poderioz nabarmen hondatuta baitago) eta joko seguruagoekin, modernoagoekin eta inklusiboagoekin ordezkatzea biltzen du.
"Esku-hartzeak 136 metro koadroko azalera izango du, eta honako hauek barne hartuko ditu: adin desberdinetara egokitutako haur-jolasak, segurtasuneko kautxu jarraituzko zoruak eta mugikortasun murriztua edo dibertsitate sentsoriala duten haurrentzako elementu irisgarriak", azpimarratu dute Gasteizko Udaletik prentsa-ohar baten bitartez.
Hala, eta ildo horretatik jarraituz, lanek 109.000 euroko lizitazio-aurrekontua eta lau hilabeteko gauzatze-epea dute, azpimarratu dute bertatik.
“Enrique Eguren kaleko haur-parkea berritzea jolasa, bizikidetza eta inklusioa sustatuko duten kalitatezko espazio publikoak eskaintzeko dugun konpromisoaren beste adibide bat da”, adierazi du Beatriz Artolazabal Espazio Publikoaren eta Auzoen zinegotziak. “Haur guztiek, haien gaitasunak edozein izanda ere, aisialdiaz berdintasun- eta segurtasun-baldintzatan gozatu ahal izatea nahi dugu”.
Obrak laster hasiko dituzte, administrazioko izapidetze guztiak amaitu ondoren. “Lanean jarraitzen dugu Gasteiz hiri dibertigarriagoa izan dadin, aisialdirako eskaintza handiagoak izan ditzan eta haur eta familientzat eskuragarriagoa izan dadin”, gaineratu du zinegotziak.
