Berri onak txikizkako sektorearentzat Araban eta Euskal Autonomia Erkidego osoan. Eustat Euskal Estatistika Erakundeak egindako txikizkako merkataritzaren indizearen txostenaren arabera, 2022ko lau hiruhilekoko salmenta-indizeak %0,6ko urte arteko hazkundea izan du Araban eta %0,3koa Euskal Autonomia Erkidegoko zenbaketa orokorrean. Hala ere, nabarmendu behar da salmenten guztizkoa (hemen ez dira zerbitzuguneak aipatzen) ehuneko puntu koma bi jaitsi dela azken hiruhilekoan, aurreko urteko hiruhileko beraren aldean.
Hala, eta ildo beretik jarraituz, Euskal Autonomia Erkidegoko txikizkako merkataritzaren sektorearen salmentek %0,3ko igoera izan dute 2022ko laugarren hiruhilekoan, aurreko urteko hiruhileko berarekin alderatuta, egutegiaren ondorioak atera ondoren eta prezio konstanteetan. Lurraldeka, iazko urtearen laugarren hiruhilekoko salmenten indizeak %2,8ko igoera izan du urtetik urtera Bizkaian, eta %0,6koa Araban. Gipuzkoak, berriz, kontrako joera agertu du, eta salmentak aurreko urteko hiruhileko berean erregistratutakoak baino %3,6 txikiagoak izan dira. Aurreko hiruhilekoarekin alderatuta, salmenten bilakaera positiboa izan da Araban eta Bizkaian, eta %0,9ko eta %0,8ko igoerak izan dituzte, hurrenez hurren. Gipuzkoako salmentek, aldiz, % 1,8ko beherakada izan dute urteko hirugarren hiruhilekoarekin alderatuta. Euskal Autonomia Erkidego osoan, “2022ko laugarren hiruhilekoan txikizkako merkataritzaren sektorean aritu diren langileen kopuruak %1,8ko igoera izan du aurreko urteko laugarren hiruhilekoarekin alderatuta. 2022ko hirugarren hiruhilekoarekin alderatuta, berriz, enpleguak %0,3ko igoera izan du”, nabarmendu zuten txostenean.
Bestalde, sektoreka, 2021eko laugarren hiruhilekoarekin alderatuta, Elikagaietan prezio konstanteetan egindako salmentek %1,6ko beherakada izan dute urtetik urtera. Gainerako produktuen kasuan, salmentek %0,8ko beherakada izan dute 2022ko laugarren hiruhilekoan, 2021eko azken hiruhilekoarekin alderatuta. Automoziorako erregaiaren sektorean, berriz, salmentak aurreko urteko azken hiruhilekoan baino %22,4 handiagoak izan dira. “Urtaro-ondoriorik gabe eta prezio konstanteetan, Automoziorako erregaiaren eta Gainerako produktuen salmentek %5,3ko eta %0,9ko igoera izan dute, hurrenez hurren. Elikagaietan egindako salmentek, berriz, %1,4ko beherakada izan dute hiruhilekotik hiruhilekora”, erantsi zuten. Elikagaiei lotutako txikizkako merkataritzaren barruan, Elikagaietan, edarietan eta tabakoan espezializatutako merkataritzan (fruta-dendak, harategiak, arrandegiak eta abar) egindako salmentek %6,2ko beherakada izan dute 2021eko laugarren hiruhilekoarekin alderatuta. Aitzitik, Elikagaiak, edariak eta tabakoa nagusi diren espezializatu gabeko txikizkako merkatari-tzan, salmentek %0,6ko igoera izan dute. “Gainerako produktuen txikizkako merkataritzan, 2022ko laugarren hiruhilekoko salmentek aurreko urteko hiruhileko berarekin alderatuta izan duten bilakaera ez da homogeneoa izan”, esan eta gaineratu zuten txostenean: “Beste kontsumo-ondasun batzuetan espezializatutako sektorean (kirol-gaiak, jokoak edo jostailuak, besteak beste), salmenten beherakada %10,3ra iritsi da, Etxeko ekipamenduetan espezializatutakoan (etxetresna elektrikoak, altzariak eta telekomunikazio-ekipamenduak) %3,7ra, eta Gainerako produktuak nagusi diren espezializatu gabekoan (korrespondentzia edo Internet), berriz, %2,0ra. Pertsonen ekipamenduan espezializatutako merkataritzan (arropa, oinetakoak eta kosmetikako edo higieneko produktuak), aldiz, %6,5eko igoera izan da urtetik urtera”.
Azkenik, 2022ko lau hiruhilekoetan metatutakoa kontuan hartuta, txikizkako merkataritzaren salmentek %2,9ko igoera izan dute. Ildo horretan, Automoziorako erregaia eta Gainerako produktuak azpisektoreek ekarpen positiboak egin dituzte (%7,1eko eta %5,2ko igoera, hurrenez hurren). Elikagaien sektorean, berriz, 2022. urte osoan metatutako salmentak 2021ekoak baino %0,4 txikiagoak izan dira. “Lurralde historikoak kontuan hartuta, 2022. urtean txikizkako merkataritzaren salmentek %3,7ko igoera izan dute Gipuzkoan, eta %3,2koa Bizkaian. Araban, berriz, %0,1eko beherakada izan da”, ondorioztatu zuten Eustatetik.
Xehetasunez
Datuak. Euskal Autonomia Erkidegoko txikizkako merkatari-tzaren sektorearen salmentek %0,3ko igoera izan dute 2022ko laugarren hiruhilekoan, aurreko urteko hiruhileko berarekin alderatuta, egutegiaren ondorioak atera ondoren eta prezio konstanteetan. Lurraldeka, iazko urtearen laugarren hiruhilekoko salmenten indizeak %2,8ko igoera izan du urtetik urtera Bizkaian, eta %0,6koa Araban. Gipuzkoak, berriz, kontrako joera agertu du, eta salmentak aurreko urteko hiruhileko berean erregistratutakoak baino %3,6 txikiagoak izan dira. Aurreko hiruhilekoarekin alderatuta, salmenten bilakaera positiboa izan da Araban eta Bizkaian, eta %0,9ko eta %0,8ko igoerak izan dituzte, hurrenez hurren. Gipuzkoako salmentek, aldiz, %1,8ko beherakada izan dute urteko hirugarren hiruhilekoarekin alderatuta.
Esaldia. “Lurralde historikoak kontuan hartuta, 2022. urtean txikizkako merkataritzaren salmentek %3,7ko igoera izan dute Gipuzkoan, eta %3,2koa Bizkaian. Araban, berriz, %0,1eko beherakada izan da”.
