- AEK-k eta Korrikak aurkeztu berri zuten 22. Korrikaren abestia atzo, abenduak 16, Iruñeko Golem Baiona zinema aretoan. HitzEkin du izenburu, eta Nerea Urbizu da abestiaren zuzendari artistikoa. Ane García, Anari eta Nerea Urbizu bera dira interpreteak, eta hitzak Sustrai Colinak idatzi ditu. Halaber, Tripulante Produce-ko kide den Eymard Uberetagoena aritu da bideokliparen ekoizle lanetan. Aurkezpenean, gainera, Asier Amondo Korrika arduradunak eta abestiaren eta bideokliparen egileak izan direnek hartu zuten parte.

Urbizuren esanetan, "abestia emozionala da, soziala; pop kutsua dauka gehienbat, eta hiru adin desberdineko emakumek abestua da, gure helduen eta txikien arteko katearen sostengu eta bitartekaritza irudikatzeko". Mezuari dagokionez, Urbizuk esan zuen "irekia" izan arren, "balore garrantzitsuak" bultzatzen dituela: "Ausarta izatea, ahalduntzea, oztopoen gainetik aurrera egitea edota beldurrak gainditzea".

Aurkezpenean, Eymard Uberetagoenak ekoiztutako bideoklipa ikusteko aukera ere izan zuten gerturatutakoek. Horren harira, Urbizuk azaldu zuen "hainbat istorio biltzen dituen film laburra" dela, eta "jendeak korrika egiteko motibazio ezberdinak dituen moduan, gure Korrikarekin ere halako zerbait gertatzen da: sentsibilitate desberdineko jendea biltzen dituen arren, denoi eragiten digun indar bat, poz bat, babes bat da".

Amondok, bere aldetik, azpimarratu nahi izan zuen HitzEkin leloaren esanahia, abestiaren izenburua ere badena: "Hizkuntza bat hitzekin osatzen da, baina ekimenek eraikitzen dute hizkuntza baten komunitatea" zion Korrika arduradunak. Eta harago joan zen, "unea orain dela" esantera ausartu zen eta: "Euskara hitzetik ekintzara pasatzeko unea; aldekotasunetik konpromisora jo behar da eta konpromisotik eragitera, erakunde orok urrats sendoagoak emateko jendartearen nahiei eta beharrei erantzuteko".

Abestia zein bideoklipa daude eskuragarri Korrikaren webgunean eta baita AEK-Korrikaren sare sozial guztietan ere.