Eusko Jaurlaritzako Osasun Sailak eta Osakidetzak lau milioi euroko inbertsioa egingo dute Guardiako (Araba) osasun zentro berria eraikitzeko, eta proiektua kontrataziora atera du ostegun honetan. Zentroa 2029an irekiko da, hiru solairu izango ditu, eta egungoa baino sei aldiz espazio gehiago egongo da zerbitzu berriak eskaintzeko, udalerrian bertan eta inguruko herrietan eskaintzen den arretaren kalitatea hobetze aldera.

Jaurlaritzatik jakinarazi dutenez, egungo zentroak 195 metro koadroko azalera eraikia du, eta ozta-ozta ematen du biztanleriaren beharrak betetzeko osasun estaldura nahikoa; gainera, biztanleria bikoiztu egiten da udako hilabeteetan.

Bestalde, Guardia Arabako Errioxako eskualdeko hirigune nagusia da, eta, beraz, bere erreferentzia eremuko udalerrietako beste zerbitzu batzuk ere hartzen ditu bere gain, hainbat diziplinatan, gaur egun Lezako ospitalean zentralizatuta zeuden zerbitzuak eskaintzeko beharrarekin batera.

Ekipamendu berria Barbacana eremuko lursail batean eraikiko da, eta sarbide hobeak eta espazio nahikoa izango ditu, zentroak Guardiako biztanleek eta ingurukoek behar dituzten zerbitzuez hornitu ahal izateko. Zehazki, 1.250 metro koadroko azalera eraikia izango du, hiru solairutan banatuta.

Familiako Medikuntzako bi kontsulta, BAME kontsulta bat, Familiako Erizaintzako hiru kontsulta, Pediatriako kontsulta, Pediatriako Erizaintzako kontsulta, edoskitze gela Odontologiako kontsulta, hortzetako higienerako kontsulta, Emagin-kontsulta, Fisioterapiako kontsulta eta Optometriako kontsulta bana, eta medikuentzako eta erizainentzako bi kontsulta gehigarri izango ditu. Erabilera anitzeko gelak eta talde jarduera edo beste zerbitzuetara zuzendutako gelak egongo dira.

Zentroan 15 profesionalek baino gehiagok egingo dute lan egunero; gaur egun, aldiz, lau profesionalek egiten dute lan (Familiako mediku bat, erizain bat eta bi administrari).

Guztira, Osasun Sailak eta Osakidetzak 3.999.000 euroko inbertsioa aurreikusi dute, obra, ekipamendu hornidura eta proiektua barne. Egikaritze epea 42 hilabete ingurukoa da, proiektua idazteko espedientearen lizitazioa hasten denetik zenbatzen hasita.