Gasteizko Udalak Martin Ttipiako ingurunea ireki die herrotarrei, Alde Zaharreko gune historikoa berreskuratu eta auzotarren egungo erabilera eta beharretara egokitzeko lanak bukatu ondoren.
Maider Etxebarria alkateak inaugurazio ekitaldian adierazi duenez, "gaur hiri kalitatea hobetu dugu eta bizilagunek aspalditik eskatzen zutenaren araberako itxura eman diogu espazio honi".
"Azpiegitura berdea, haurrentzako jolasak eta gure hiriaren ikuspegi ikusgarria eskaintzen duen begiratoki panoramikoa dituen leku atsegina estreinatu dugu. Azken finean, jolaserako eta aisialdirako leku erakargarri bihurtu dugu, eta, aldi berean, hiria turismogune gisa kokatuko du", esan du.
Bada, esku hartzea bi eremu nagusitan garatu da. Alde batetik, erabat berritu da Martin Ttipia plaza, garai bateko elur zuloen, Bakardade kantoiaren eta Frai Zacarias kaleko eraikinaren atzealdean dagoena.
Aurreko zoladura kendu da espazio erakargarriagoa sortzeko, lore ugariko parterre organikoekin, banku eta harmaila berriekin, eta erabat berritutako jolasgunearekin. Hain zuzen, jolasgunean zabuak eta harresiari atxikitako gaztelu bat jarri dituzte, hodi itxiko txirrista handi batekin. Gainera, dorreetako bat begiratoki gisa egokitu da, Alde Zaharraren gaineko bistak eskaintzeko.
ONDARE HISTORIKOA
Bestalde, Montehermoso Jauregirantz zuzeneko irteera berria egokitu da Harresiaren Lorategiaren azken zatian. Lotura horri esker, hiriko bi espazio berezienen arteko ibilbide jarraitua osatu ahal izango da, natura, ondarea eta oinezkoen joan-etorria integratuz. Itxitura eta azken baranda jartzea baino ez da falta esku hartzea amaitutzat emateko.
Azkenik, proiektuak ondare historikoaren eta ingurune naturalaren arteko lotura indartu du, espazio lasaiagoak, irisgarriagoak eta eguneroko erabilerarako egokiagoak sortuz.
