Gasteizko Udalak Jarduketa Protokolo Orokorra sinatu du Kodetze Komertzialeko Espainiako Elkartearekin –Fabrikatzaile eta Banatzaileen Elkartea (AECOC)–, hiriko salgaien banaketa eredu berria sustatzeko, jasangarriagoa, eraginkorragoa eta hiriko bizi kalitatearekin bateragarria.
Akordioa Udalak klima aldaketaren aurkako borrokarekin eta hiri ingurunearen hobekuntzarekin duen konpromisoaren barruan dago, funtsezko tresnen bidez, hala nola 2021-2025 aldirako Mugikortasun Jasangarriko eta Espazio Publikoko Plana eta Gasteizko Klima Ekintzako Estrategia. Mugikortasun-politiketan ahaztu ohi den salgaien banaketa, sendotu egingo da, eta lehentasunezko esku-hartze eremua bilakatuko da emisio kutsatzaileak murrizteko, garraioaren eraginkortasuna hobetzeko eta espazio publikoa libre uzteko.
“Hiri logistika ez da garrantzi gutxiko gaia: zuzenean eragiten die trafikoari, kutsadurari eta herritarren egunerokotasunari. Protokolo horrek aukera ematen digu gure egoera zehatz-mehatz aztertzeko eta salgaien banaketarako soluzio errealista eta jasangarrietarantz aurrera egiteko”, azaldu du Beatriz Artolazabal alkateorde eta Espazio Publikoko zinegotziak. “AECOC funtsezko bazkidea da prozesu honetarako, duen esperientziagatik, gaitasun teknikoagatik eta bere enpresa sarearen irismenagatik”, gaineratu du.
AECOC, BPG nazionalaren % 20 ordezkatzen duten 33.000 enpresa elkartu baino gehiagorekin, fabrikatzaileek, banatzaileek eta operadore logistikoek parte hartzen duten herrialdeko erakunde nagusia da. Smart Distribution Batzordea eta Garraio eta Delivery Lantaldea Espainiako hainbat udalerrirekin lankidetzan aritu dira dagoeneko, hirian integratuago egongo diren eredu logistiko berriak definitzeko.
