Arabako Binakako Bertsolari txapelketa apirilean abiaraziko da 18 bertsolarirekin

Aurten, lehen aldiz jokatuko da Binakako Bertsolari Txapelketa, bertsolariek elkarlanean, kantuan arituko diren sariketa

27.03.2021 | 23:23
Arabako Binakako Bertsolari Txapelketaren aurkezpenean atzo egindako irudia. Argazkia: Josu Chavarri

Aurten lehen aldiz, bertsolaritza txapelketak binakako taldeetan egingo dira. Hala jakinarazi zuten atzo Arabako Bertsozale Elkartetik, bertsolarien arteko txapelketak apirilean hasiko direla iragarri ondoren.

"Udazkenean Arabako txapelketako lau kanporaketa saio egin ondoren, egoeraren ziurgabetasunak bultzatuta eta banakako txapelketak izan zitzakeen oztopoen aurrean txapelketari forma alda-tzea erabaki genuen", azaldu eta gaineratu zuten elkartetik: "Bertsolariek lasai kantatu ahal izateko baldintza egokiak bermatzen ez zirenez eta egoeraren aldakortasunak berak sortu zitzakeen gorabeherak izan dira erabakia har-tzeko arrazoi nagusiak". Egoera horren aurrean, elkarteko taldeak txapelketetan jokatzeko modua aldatu behar zutela erabaki zuen. "Txapelketak bertso komunitatean duen garrantzia kontutan harturik, bertso plaza eta kultura sustatzen jarraitu nahi izan dugu. Aurtengoan Arabako Binakako Bertsolari Txapelketa izango dugu, bertsolariak binaka arituko dira", nabarmendu zuten. Txapelketa atzo aurkeztu zen Zigoitin. Jokoa bera, apirilaren 17an hasiko da eta maiatzaren 22an bukatu. 2020ko udazkenean burutu ziren kanporaketetan sailkatutako hamabikotea eta 2019ko Arabako Bertsolari Txapelketako, zuzenean sailkatutako sei finalistak izango dira lehiatuko direnak, denera bederatzi bikotetan banatuak.

Horrela, esan bezala, guztira, 18 bertsolari izango dira txapelketan arituko direnak, (bederatzi talde), sei aurkezle, bederatzi gai jartzaile, bederatzi epaile bost herrietan eta Gasteizen, 450 entzulerekin lehenengo bost saioetan eta 400 entzulerekin finalean. Lehiatuko diren 18 bertsolarien artean, elkarteak atzo nabarmendu zuen gazteenak 19 urte dituela, Aitor Ugarteren kasuan, eta zaharrena, 62 urte, (Rikardo Gonzalez de Durana). Lehiaketa binaka egiteko erabakia ez zegoen hasieratik hartuta. Izan ere, hasiera batean, elkarteak urtero egin izan den bezala egiteko asmoa zuen, baina abenduan mekanika aldatzea erabaki zuten, koronabirusaren pandemiak Euskal Autonomia Erkidegoan izan zuen bilakaeraren ondorioz. "Nahiko erokeria izan da txapelketa hau prestatzea. Uda pasata, dena prestatzen hasi ginen. Baina denborak aurrera egin zuen, ez genekien zer gertatuko zen Gabonetan, arazoak ikusten genituen. Azkenean erabakiak hartu behar izan genituen abenduan koronabirusen pandemiagatik murrizketak hartu zirenean", azaldu zuen Ekaitz Elorriaga elkarteko lehendakariak egunkari honetan. Azkenean binakako taldeetan egitea erabaki zuten eta pozik agertu zen erabaki horrekin: "Gutxi falta da binakako txapelketa honi hasiera emateko eta oso pozik eta gogotsu gaude", gaineratu zuen lehendakariak.

Elkartea 1982an antolatze lanak hasi baziren ere, Arabako Bertsozale Elkartea 1993an sortu zen. Hau da, 40 urte inguru daramatzate kultura hau gazteenei eta baita adinekoei ere hurbiltzen eta, horregatik, urte hauetan gero eta proiektu gehiago egin dituzte. Gainera, diru-irabazpen asmorik gabeko Elkarte soziokulturala da eta bertsolari-tzaren geroa ziurtatzea du helburu. Lan profesionala eta borondatezkoa uztartzen ditu eta gainon-tzeko elkarte eta herri instituzioekin elkarlanean lantzen ditu proiektuak. Arabako herrietako bertso-eskolekin batera lan egiten du. Era berean Euskal Herriko Bertsozale Elkartearen partaidea da Bizkaia, Gipuzkoa, Nafarroa eta Iparraldearekin batera. Egun, Arabako Bertsozale Elkarteak 170 bazkide inguru ditu eta Gasteizko Amaia Zentroan du egoitza, 2002. urteaz geroztik. Bestalde, elkarte honen helburuetako bat bertsolaritzaren tradizioarekin jarraitzea ez ezik, euskararen erabilera bultzatu eta motibatzea ere bada. Horretarako, bertso-eskolak bultzatzen dituzte elkarte horretatik. Proiektu honen bidez, bertsolaritza txikienengana eraman nahi dute, jolasteaz gain, irudimenetik sortzeko eta kantatzeko gai izan daitezen.

Elkarte horrek askoz proiektu gehiago ere lantzen ditu.Eta koronabirusak sektore eta elkarte guztietan normaltasuna moteldu duen arren, baita elkarte honetan ere, lanean jarraitzen dute ahalegin eta mimoz arabarren eta gasteiztarren artean bertsolaritza bere horretan jarrai dadin. "Konfinamenduan ere ez ginen geldirik egon. Beti egon gara lanean, fisikoki izan ez bada telefonoz artatzen jarraitu dugu eta ordenagailuarekin konektatuta egon gara, elkarteak ez dio fun-tzionatzeari utzi", azpimarratu zuen lehendakariak. Eta oraingo honetan etengabeko lan horrek lehiaketa berri bat antolatzera eraman ditu, hori bai, biren artean, aurten berrikuntza gisa.

Apirilaren 17an hasi eta maiatzaren 22ra arte iraungo duen lehiaketa izango da.

noticias de noticiasdealava