Duela hiru urte eta erdi baino gehiagotik (2018ko urtarrilaren 15etik) 300 pentsiodun inguru ateratzen dira astelehenero kalera beren eskubideak aldarrikatzeko. Berdin dio euria edo eguzkia egiten duen, pentsiodunak pentsioetan hobekuntzak lortzeko borrokatzen dira, Pentsio duinak lelopean. Besteak beste, 1.080 euroko gutxieneko pentsioak eskatu dituzte, bankuetan arreta duina jasotzea, gestio guztiak Internet bidez egin behar izan gabe, eta argiaren prezioaren igoeraren aurkako protestak ere egin dituzte. Aste honetatik aurrera, bozeramale berri bat izango da mugimenduan; bozeramaile hori, hasieratik bertako kide izateaz gain, Bizitza duina elkarteko arduraduna ere bada. Bere ikuspuntutik, egunkari honetan dio mugimendu horri “oraindik borroka asko geratzen zaizkiola egiteko, horrela bakarrik lortuko baitugu gure eskubideak defendatzea”.
Arabako Pentsionisten mugimenduak aurrera jarraitzen du, bozeramaile berriarekin.
-Mugimenduaren komunikazioaz arduratuko naiz, baina gainerako guztian beti bezala jarraituko du. Arabako Pentsionisten mugimenduko kide guztiok gure eskubideen alde jarraituko dugu beti bezala, ez da ezer aldatuko. Guztiok gara bozeramaileak. Lan asko dugu egiteko, eta modu koordinatuan, bateratuan eta guztion artean iritzia emanez egiten dugu beti.
Hiru urte eta erdi daramatzazue borrokan. Zer balorazio egiten duzu egindako bideari buruz?
-Pentsiodunak egiten ari garen borrokaren balorazio oso positiboa egiten dut. Manifestaziora aterako ez bagina, seguru asko, gure baldintzak ez genituzke inolaz ere hobetuko. Gure ustez, lehenengo lorpena Alderdi Popularraren eta EAJren arteko akordioa izan zen, 2018an, pentsioak KPIparekoak izan zitezen. Hori funtsezkoa izan da guretzat.
Hain borroka luzea, kontzientzia soziala sortu du?
-Bai, noski. Gizarteak ulertu du pentsioak ezin direla une politikoaren eta ekintza ekonomikoen mende egon. Adinekook bizi-berme duina izateko eskubidea daukagu, eta hori behar adinako baliabideekin bermatu behar da. Horren gainean, eztabaida sortu dugu gizartean.
Nolakoa izatea gustatuko litzaizuke mugimendu honen etorkizuna?
-Kalean egongo gara gure aldarrikapen guztiak entzun arte. Ez dakit horrek urtebete edo bi iraungo duen, edo zer unetan entzungo gaituzten eskatzen ari garen eskaera logikoetan. Politikariek entzungo baligute, negoziatzea lortuko bagenu, pentsio duin horiek eta gure ongizaterako logikoak diren eskaerak lortuko bagenitu, kalean egoteari utziko genioke. Baina, oraingoz, astelehenero pentsioen egoera salatzen jarraituko dugu. Erreibindikazioei kasu egiten zaienean beste kontu bat izango da. Baina, gaur egun, oraingoz, kalean jarraituko dugu. Izan ere, orain lege-proiektu bat dago mahai-gainean. Eta gauza batzuetan ez gaude ados. Adibidez, bertan, pentsio duinak ez dira bermatzen. Pentsioak publikoak eta nahikoak izatea ere ez da bermatzen. Izan ere, osatzeko pentsio-plan pribatuak sortzeaz hitz egiten ari dira. Eta ez gaude batere ados pentsio-plan pribatuak sortzearekin, ez baitute ezer bermatzen; hau da, pentsio plan pribatu horrek ez du bermatzen pentsiodunek dagokien guztia kobratuko dutenik.
Urtetik urtera bada jendea mugimenduarekin bat egiten duenik?
-Baietz uste dugu. Ez dakit kaleetan ikusten den ala ez. Baina gero eta jende gehiagok deitzen eta galdetzen digu egiten dugunagatik. Astelehenero errebindikazioari buruzko informazioa azaltzen duen informazio-orri bat banatzen denez, jendeak gaiaren inguruko kontzientzia eta ezagutza du, eta pentsioei buruzko ideia argiagoa egiten da. Izan ere, eztabaida politikoaren lehen mailara eraman dugu. Gai hori hor dago eta garrantzia hartu du. Arazoak konpontzeko etorri gara, ez gauza iragankor gisa.
Gazteen laguntza duzue?
-Astelehenetan jende gehiena lanean ari da eta ikasleak unibertsitatean. Egun zaila da gazteak gurekin manifestatzera etortzeko. Ez da erraza gure alde dauden ala ez neurtzea. Hala ere, manifestazio handietan, larunbatetan deitu ohi ditugunean, ikusten dugu gazteak laguntzen ari direla; gurekin bat egiten dutela. Gure azken kontzentrazio handian, % 30 inguru gazteak ziren. Nik uste dut gero eta kontzientziatuago daudela. Egia da pentsioen gaia agian gutxiago interesatzen zaiela, baina ulertu behar dute etorkizunean eurei ere eragingo diela eta horregatik guk gure kausaren alde egitera animatzen jarraitzen dugu; gurekin borroka dezatela, manifestazio handietara etor daitezela eta borroka horri jarrai diezaiogun gizarte osoak. Gainera, beste gai batzuen alde ere borrokatzen gara. Adibidez, gutxieneko soldaten alde. Gai horiek ere eragiten diete, eta, beraz, gazteak gurekin borrokatzera animatzen ditugu.
Zenbat lan egiten da aldez aurretik manifestazio bat egin baino lehen?
-Egunero lan handia egiten dugu Arabako Pentsionista mugimendutik. Manifestazioaren aurreko ordietan bilera batean gaude, aurreko manifestazioa nolakoa izan zen aztertzeko, astea nola antolatuko dugun antolatzeko, egiteke dauden lanak banatzeko... Gainera, informazio-agenda jarraitzen dugu, oharrak prestatzen ditugu, besteak beste. Oso lanpetuta gaude honekin.
