Gizon bat atxilotu dute Gasteizen bi pertsona arma zuri batekin zauritzeagatik

Ertzaintzako agenteek gazte bat atxilotu dute atzo goizean Arabako hiriburuan, beste bi mutili arma zuriz eraso egin dielakoan. Dirudienez, hainbat pertsonaren arteko borroka batean gertatu dira lesioak, oraindik ezagutzen ez diren arrazoiengatik, bide publikoan.

Atzo goizeko zazpiak laurden gutxi aldera, Ertzaintzak jakin du liskarra izan dela Gasteizko Estenaga monsinorearen kalean. Hainbat polizia bertaratu dira, eta, antza denez, arma zuriz zauritutako bi gazte aurkitu dituzte, horietako bat bizkarrean eta bestea besaurrean, eta pertsona talde batek eraso egin diela adierazi diete. Handik gutxira, bi zaurituak Txagorritxuko ospitalera eraman zituzten, osasun-arreta jasotzeko.

Horrez gain, borrokan parte hartu zuen eta buruan eta esku batean zauriak zituen beste gizon bat ere aurkitu zuten handik gertu. Gizon hori bat zetorren arma zuriz egindako lesioen ustezko egileak emandako deskribapenarekin; horrenbestez, atxilotu egin dute, eta, jarraian, ospitalera eraman dute.

Atxilotua, 21 urtekoa, epailearen esku utziko dute, beharrezko polizia-eginbideak amaitzen direnean.

Bestalde, Ertzainek gazte bat atxilotu dute ostegunean goizaldean, Bizkaiko hiriburuko etxe batean lapurretan ari zenean etxeko batek ustekabean harrapatu ondoren. Dirudienez, atxilotua eskalatuz igo da etxeko balkoira.

Goizaldeko bostak aldera, partikular batek SOS Deiak 112 zerbitzura deitu du, pertsona bat Abandoko eraikin bateko fatxada eskalatzen ari zela esanez. Lekura hurbildu diren patruilek keinuak egiten zizkien emakume bat ikusi dute balkoi batean, eta agenteak eraikineko atarian sartu direnean, gizon bat aurkitu dute. Honek, agenteak ikustean, buelta eman eta eskaileretan gora ihes egin du. Handik laster, susmagarria eraikineko goiko solairuetako bateko eskailburuan ezkutatuta aurkitu dute.  

Gero egiaztatu ahal izan dutenez, pertsona hori lehenengo solairuko etxe batean sartu da eta etxean bizi den pertsona batekin topo egin du, eta honek etxetik irteteko agindu dio. Atxilotuak etxe horretatik lapurtutako telefono mugikor bat zeraman bere gauzen artean.

Atxilotua, polizia-aurrekariak dituen 30 urteko gizona, gaur egunean zehar jarriko dute agintari judizialaren eskuetan.