Basque Team Fundazioak bere kirolarien bizipenak bideopodcast moduan ezagutzera emateko 'Matx' programa izango du aurten ere, Matx tokiko kirolaren sare sozialarekin lankidetzan, programak jarraipena izango baitu goi mailako euskal kirolarien beste aldea erakusteko asmoarekin.

Basque Team Fundazioak eta Matx sare sozialak kirol minoritarioari ikusgarritasuna ematen jarraitzea dute helburu, "baina modu originalean", eta "goi mailan lehiatu arren ikusgarritasuna behar duten euskal kirolarien beste aldea erakusteko bideopodcasta" ekoitziko du Matxek.

Horretarako, Basque Teamen laguntza izango du berriz ere, Fundazioaren beka duten eta masiboak ez diren kiroletan nazioartean lehiatzen diren kirolariek parte hartuko baitute solasaldietan. Hala ere, ez dira ohiko kirol elkarrizketak izango; kirolaz hitz egingo den arren, jendearentzat hain ezagunak ez diren protagonisten beste alderdi batzuk azaleratzen saiatuko da saioa.

Saioa maiatzaren 31ean hasiko da baina lehen aurrerapen bat asteburu honetan emitituko da. Lehen gonbidatua Nahia Zudaire igerilaria izango da. "Denboraldi honetako grabazioak martxan jarri ditugu jada, eta beste behin ere, oso gustura gaude kirolariekin. Euren alde intimoa, dibertigarria eta hurbila erakusten ari dira", nabarmendu du Aratz Losada saioko aurkezleak.

"Serio jarriko gara, gai sakonagoak ere jorratuko ditugu, eta, jakina, gure izaera ganberroari eutsiko diogu, lehen denboraldian bezala, gonbidatuak estutasunen batean jarriz, ustekabeko erronkaren batekin", gaineratu du.

'Matx' podcastaren bigarren denboraldiak sei kapitulu izango ditu, iaz bezala. Abuztuan eta abenduan izan ezik, sare sozialeko eta Basque Teameko jarraitzaileek programa berria ikusi ahal izango dute gainerako hilabete guztietan. Entzuteaz gain, saioa ikusteko aukera ere izango da.

Atal guztiak www.matx.eus sare sozialean ikusi ahal izango dira. Era berean, Basque Teameko plataforma digitalek, Matx-ek eta Tokikom taldeko tokiko hainbat komunikabidek ere saioak eskainiko dituzte beren web, telebista eta irratietan.