PLAY OFF ACB
El Baskonia ya conoce su rival en cuartos
La Vitoriana futbol-zelaiak 270 paneleko eta 124 kilowatteko potentziadun instalazio fotovoltaikoa izango du
Kirolgunea estalkietan eguzki-panelak dituzten beste udal-eraikin batzuen zerrendara gehituko da
Tokiko Gobernu Batzordeak La Vitoriana futbol-zelaian plaka fotovoltaikoak instalatzeko kontratua esleitu du. “Proiektua Zaramaga biziberritzeko eta hiri-berroneratzea lortzeko planean sartuta dago, auzoa deskarbonizatzeko egindako inbertsioen baitan. Horretarako, etxebizitzak birgaitzen eta Udalaren eraikinetan energia-eraginkortasuneko neurriak aplikatzen ari gara”, azaldu du Maider Etxebarriak, Vitoria-Gasteizko alkateak.
Instalazio fotovoltaikoa La Vitorianako aldagelen eraikin gainean jarriko da. Guztira, kristalezko 270 panel jarriko dira gehieneko potentzia gisa 124 kilowatteko muga sortzeko.
Proiektuaren inbertsioa 121.200 eurokoa izango da eta lanak Stratenergy enpresak egingo ditu. Horretarako, esleipenaren ondoren, 6 hilabeteko gauzatze-epea izango dute.
Esku-hartze horren bidez, Udalaren eraikinetan instalazio fotovoltaikoak martxan jartzeko prozesuan aurrera egingo da. La Vitoriana zelaia estalkietan aurretik instalazio fotovoltaikoak dituzten beste batzuei gehituko zaie: San Andreseko kiroldegia, Abastos plaza edo Jundizeko tratamendu mekaniko biologikoko instalazioa.
“Proiektu hauek Gasteiz klima-aldaketaren aurka egiten ari den borrokarekin lotuta daude. Hori guztia honako neurri hauen bidez bideratu beharra dago: kontsumoa gutxitzea, instalazio eraginkorragoak erabiltzea eta energia berriztagarria produzitzea”, azaldu du Etxebarriak.
Gasteizek klima-aldaketaren aurkako borrokan modu aktiboan parte hartzeko konpromiso argia hartu du bere gain. “Hain zuzen ere, negutegi-efektuko gasen isurpenak gutxitzeko prozesuak bizkortzeko eta 2030ean neutraltasun klimatikoa lortzeko asmoz Europako Batzordeak abian jarritako Misioan sartuta dauden Europako 100 hirietako bat gara”.
Zaramaga Biziberritzeko Planak udal gobernuaren konpromiso estrategikoetako bati erantzuten dio. Joan den mendeko 60ko hamarkadako industrializazioan sortutako auzo horretako esku-hartzea Eusko Jaurlaritzako Etxebizitza Sailak auzoen hiri-berroneratzerako sortutako Inbertsio Estrategikoen Erakundearteko Planaren jardueretako bat da, eta 30 milioi euro baino gehiagoko inbertsioa ekarriko du.