Gasteizko Europa Biltzar Jauregiko aparkalekua txandakako aparkaleku publiko gisa erabiltzearen bideragarritasuna aztertzeko Tuvisa hiri autobusen udal enpresak eskatutako txosten teknikoak ondorioztatu du azpiegitura helburu horretarako erabil daitekeela, indarrean dagoen araudia betez.
Gasteizko Udaletik jakinarazi dutenez, 2025eko azaroan udalbatzak onartutako mozioak eskatutakoa betez egin da txostena, eta aparkalekua aparkaleku publiko gisa ustiatzeko egokia dela zehaztu du. Horrekin lotuta, martxan jarri ahal izateko beharrezko urrats administratibo eta teknikoak jasotzen ditu.
Txosten teknikoak azpimarratu du, gainera, aparkalekuak beharrezko baldintza tekniko eta arauemaileak betetzen dituela, azken urteotan egindako eraberritze, modernizazio eta egokitzapen jarduerei esker, besteak beste, segurtasun eta ebakuazio sistemak hobetzea, suteetatik babesteko instalazioak berritzea, sarbideak modernizatzea eta irisgarritasunaren arloan indarrean dagoen araudira egokitzea.
Hurrengo urratsa dagokion titulu gaitzailea izapidetzea izango da. Prozedura horrek, seguru asko, beharrezko aurretiazko egokitzapen tekniko batzuk ezarriko ditu baimen hori behin betikoz eman aurretik.
Europa Jauregiko aparkalekuak 96 plaza ditu gaur egun, hiriaren ingurune estrategiko batean txandaka erabiltzeko, horietako zazpi ibilgailu eraginkorrentzat. Gainera, garraio publikoko konexio garrantzitsuen ondoan dago.
Izaskun Reyes Tuvisako presidenteak positibotzat jo du azterlanaren ondorioa: "Txosten honekin udalbatzarekin hartutako konpromisoa bete dugu, eta aurrera egiten jarraitzen dugu mugikortasuna hobetzen eta dauden azpiegitura publikoen erabilera optimizatzen lagun dezakeen baliabide bat herritarren eskura jartzeko".
"Orain helburua da izapidetze administratiboa osatzea eta Europa aparkalekuak txandakako aparkaleku publiko gisa berme guztiekin funtzionatu ahal izateko beharrezkoak diren egokitzapen teknikoei ekitea", esan du.
