Aste Nagusiko Bilbao Metal Pop-Rock Erakusketaren 39. edizioan izena emateko epea larunbatean bukatuko da

Bilboko Udalak Bilbao Metal Pop-Rock Erakusketa antolatu du aurten ere Aste Nagusiko musika programazioaren baitan tokiko talentua bultzatzeko asmoz, eta izena emateko epea larunbatean amaituko da, maiatzaren 16an. Orain arteko 38 edizioetan, Bilboko eta Bizkaiko 600 talde eta bakarlari inguru atera dira aurrera erakustaldiari esker.

Bilboko Udalak jakinarazi duenez, izen-ematea www.bilbao.eus webgunean egin beharko da, eta bertan kontsulta daitezke oinarriak ere. Parte hartu nahi duten bakarlari eta taldeak Bizkaiko egoiliarrak izan behar dira, edo gutxienez taldekide bat lurralde historikoan erroldatuta egon.

Erakusketa genero ugari barne hartuko ditu, hala nola metal, pop, rock, folk, rap, hip hop edo elektronika, baina ez jazza. Aniztasuna sustatzen jarraitzeko asmoz, epaimahaiak bereziki baloratuko ditu emakumeen presentzia duten taldeak eta euskarazko abestiak aurkezten dituztenak.

Parte hartu ahal izateko, online inprimaki bat bete eta honako hauek erantsi beharko dira: lau abesti original mp3 edo wav formatuan, eta taldearen edo artistaren argazkia eta ibilbide musikala. Hautatutako talde eta artistek zuzenean joko dute Bilborock aretoan Aste Nagusian; kontzertu bakoitzak 45 minutuko iraupena izango du (gehienez 50 minutu), eta gehienez bi bertsio jo ahal izango dira.

Kazetari eta musika aditu profesionalek osatutako epaimahaiak 15 proposamen aukeratuko ditu, eta horiei VillaSound 2026 lehiaketako Aste Nagusia Saria irabazten duen taldea gehituko zaie. Kontzertuak egunero bi emanalditan izango dira, 20:00etan eta 21:00etan.