Veneziako Bienalean egotea "Euskadi munduko kultur mapan kokatzea" dela dio Jaurlaritzak

Ibone Bengoetxea Eusko Jaurlaritzako lehen lehendakariorde eta Kultura eta Hizkuntza Politikako sailburuak balorazio positiboa egin du Euskadik Veneziako Bienalean izan duen presentziaren inguruan, eta nabarmendu du nazioarteko kultur hitzordu nagusietako batean egoteak "Euskadi munduko kultur mapan kokatzea" esan nahi duela.

Veneziara egindako bidaia instituzionalaren hirugarren egunean, Bengoetxeak Veneziako Bienalaren 61. edizioa bisitatu du, Irene Larraza Etxepare Euskal Institutuko zuzendariarekin eta Ander Caballero Jaurlaritzako Kanpo Harremanetarako idazkari nagusiarekin batera.

Azpimarratu duenez, "Venezian egoteak dakar nor garen eta munduan nor izan nahi dugun erakustea. Veneziako presentziak balio estrategikoa izan du euskal kulturarentzat eta sormen ekosistemarentzat, eta 2028ra begira Bienalean presentzia egonkor bat eraikitzeko lehen pausoa izan da".

Ildo horretan, Jaurlaritzak uste du etorkizunean Euskadik Bienalean espazio propio eta egonkor bat izateak aukera emango lukeela "nazioarteko ikusgarritasun iraunkorra lortzeko, diplomazia kulturalaren bidez Euskadiren irudia indartzeko eta euskal sortzaileei nazioarteko aukera berriak zabaltzeko".

Veneziako Bienala arte garaikidearen nazioarteko ekitaldi nagusitzat jotzen da, eta munduko kulturgune eraginkorrenetako bat da. 130 urte baino gehiagoko historiarekin, edizio bakoitzean ehunka mila bisitari, kultur arloko profesional, artista, komisario eta erakunde biltzen ditu mundu osotik. Nazioarteko erakusketa nagusi bat, estatu pabiloiak eta kultur zein akademia ekitaldien sare zabala uztartzen ditu, nazioarteko ikusgarritasun, legitimizazio eta kultur elkarrizketarako espazio estrategiko bihurtuz.

Maiatzaren 9tik azaroaren 22ra egingo den 61. edizioak 'In Minor Keys' du izenburu ('Tonalitate txikietan'), Koyo Kouoh komisario suitzar-kamerundarrak gidatuta. 2025ean hil ondoren ere bere horretan mantendu den proposamen kuratorialak gaur egungo munduari begiratzeko modu bat planteatzen du, ñabarduretatik, ahots ez hegemonikoetatik eta historian zehar diskurtso nagusietatik kanpo geratu diren kontakizunetatik abiatuta. Testuinguru horretan, nazioarteko arte zirkuituan historikoki ordezkaritza txikiagoa izan duten kultura eta sormen ikuspegiek protagonismo berezia hartzen dute.

Edizio honetan 100 herrialde inguruk parte hartuko dute estatuko pabiloien bidez, 110 artista eta kolektibo baino gehiago izango dira nazioarteko erakusketan, eta Veneziako hiri osoan zehar kultur eta jarduera akademiko ugari antolatuko dira.