Euskadiko 30 enpresak parte hartuko dute aste honetan Madrilgo Salon Gourmets azokan

Elikagai eta edarien sektoreko Euskadiko 30 enpresak parte hartuko dute aste honetankalitatezko elikagaietan eta edarietan oinarritutako Salon Gourmets azokaren 39. edizioan. Hitzordua Europan liderra eta munduko ospetsuenetakoa da, eta Madrilen egingo da astelehen honetatik ostegunera, apirilaren 13tik 16ra.

Eusko Jaurlaritzako iturriek jakinarazi dutenez, aurten ere, Elikadura, Landa Garapen, Nekazaritza eta Arrantza Sailak Euskadiko enpresen parte hartze bateratua sustatu du Euskadi Basque Country markaren baitan.

Euskadiko gastronomiaren onena ordezkatzen duten 18 enpresa biltzen dituen standa da (kontserbak, txarkuteria, gozoak, haragikiak, prestatutako jakiak, ardoak eta edariak), "guztiak konpromiso beraren baitan lotuta daude, hau da, kalitatezko produktuak, jatorri argikoak, eta haien know-howa eskaintzea.

Euskadiko Elikagaien Industriaren 2026ko Sustapen Planean jasotako euskal nekazaritzako elikagaien industria nazioartekotzeko eta bultzatzeko estrategiaren barruan kokatzen da baterako parte hartzea, eta marken ikusgarritasuna indartzea, aukera komertzialak sustatzea eta sektorearen kalitatea eta aniztasuna proiektatzea du helburu. Gainera, Euskadiko beste hamar enpresa egongo dira azokan, pabiloi desberdinetan, modu independentean.

Salon Gourmets kalitatezko elikagaien eta edarien Europako azoka nagusia eta mundu osoko erreferente esanguratsuenetakoa da. Gama altuko joerak erakusteaz gain, gastronomia arloko nazioarteko profesionalak bildu ohi dira. Madrilgo IFEMAn egiten da, 70.000 metro koadroko erakusketa azaleran.