Expodistrito programak erakusketa ibiltariak eramango ditu berriro Bilboko barrutietara

Bilboko Udalak Expodistrito aldi baterako erakusketa deszentralizatuen zikloa antolatu du aurten ere, eta argazkigintzako eta arte plastikoetako proposamen ugari eramango ditu hiriko barruti guztietara irailetik.

Marta Calvo Bilbao (pintura), Laura Gonzalez (ilustrazioak eta argazkiak), M'Angel Manovell (pintura), Carolina Zuluaga Zuleta (pintura), Mertxe Amondarain (marrazki digitalak), Las Cuatro Esquinas kolektiboa (argazkia), Musika Bulegoa elkartea (argazkia) eta Euskal Akuarelarien Elkartea dira aurten esku hartuko duten artista eta kolektiboak, antolakuntzak jakinarazi duenez.

Irailaren 1ean hasi eta datorren urteko urtarrilaren 5era arte, San Inazio-Ibarrekolanda, Castaños, Otxarkoaga, Begoña, Santutxu, San Frantzisko, La Bolsa, Abando eta Errekaldeko udaltegietan izango dira Expodistrito zikloko erakusketak. Guztiak doakoak izango dira eta goizez eta arratsaldez bisitatu ahal izango dira. Egitarau osoa www.kulturabarrutik.eus webgunean kontsulta daiteke.

ADIERAZPEN ARTISTIKOAK

Hala, eta ildo horretatik jarraituz, hiriko adierazpen artistikoak deszentralizatu, artista berrien lana jendaurrean aurkeztu eta dagoeneko ospetsuak diren beste batzuen erakusleiho izan nahi duen Bilboko Udaleko Kultura Sailaren ekimena da Expodistrito programa. Artearen eta sormenaren sektoreari laguntzeko ekimena da, eta 2023-2033 aldirako Bilboko Kultura Plan Estrategikoak jasotzen duen hiriko sorkuntza eta berrikuntza bultzatzeko estrategiaren zutabeetako bat, ondorioztatu dute antolatzaileek.