Vital Fundazioak 120.000 euro banatuko ditu Arabako klub eta federazioek ekipamenduak eta materiala erosteko laguntzetan

Vital Fundazioak laguntzen beste deialdi bat egin du, Arabako klub, federazio eta beste kirol erakunde batzuek kirol ekipamenduak eta materiala eros ditzaten, eta bikoiztu egin du iazko zuzkidura, 120.000 euro bideratuz eskola kirola, oinarrizko kirola, herri kirola eta kirol inklusiboa sustatzeko helburua duten proiektuak laguntzera eta bultzatzera.

Vital Fundaziotik jakinarazi dutenez, aurtengo deialdiaren beste berrikuntza bat da Arabako Futbol Federazioak Vital Fundazioaren laguntzarekin bultzatzen dituen Deportivity edo Gu geu ere bai programetan parte hartzen den ere baloratuko dela futbol kluben eskaeren kasuan.

LAGUNTZAK

Laguntza bakoitza 1.000 eta 4.000 euro bitartekoa izango da, fitxa aktiboen arabera, eta Arabako kirol klub, federazio eta erakundeek jaso ditzakete, oinarrizko kirol, herri kirol, talde inklusibo, eskola kirol, 23 urtez azpiko kirol eta senior kategorietan. Laguntzetatik kanpo daude goi mailako lehiaketako kirola, eliteko kirola eta kirol profesionala, baita nazioartean lehiatzen diren taldeak ere.

Jokorako kamisetak eta prakak, entrenamendurako arropa, igerilekuko txanoak, zirak, txirrindularitzako arropa teknikoa eta kaskoak erosteko baliatu beharko da laguntza, eta kanpoan geratzen dira dortsalak, motxilak, bandak, galtzerdiak, baloi orgak, baloiak, garaikurrak eta abar.

Era berean, laguntza eskatzen duten erakundeek sektoreko Arabako enpresa bati egin behar dizkiote erosketak, eta erositako ekipamenduek erakunde eskatzailearen eta Vital Fundazioaren markak baino ez dituzte eramango, eta ezin daiteke beste erakunde publiko zein pribatu batzuen markarik edo logotiporik agertu.

Eskaerak aurkezteko epea maiatzaren 12tik ekainaren 20ra izango da, eta parte hartu nahi dutenek www.fundacionvital.eus webgunean dagoen inprimakia bete beharko dute. Onartutako eskaerak uztailaren 8an jakinaraziko dira.