Gizarte Politiken Sailak 3. maila duten mendeko pertsonei eta Etxerako Laguntza Zerbitzuko erabiltzaileei arreta-ordutegia handitzeko aukerari buruzko informazioa eman die

Vitoria-Gasteizko Gizarte Politiken Saila hasi da 3. maila duten mendeko pertsonei eta Etxerako Laguntza Zerbitzuko erabiltzaileei arreta-ordutegia handitzeko aukerari buruzko informazioa ematen. Aste honetan hasi dira gehienez astean 21,5 ordu eska ditzaketela jakinarazteko 302 gutunak bidaltzen.

Eskutitzean azaltzen denez, arreta-orduen kopurua handitzea eskatu nahi izanez gero, bihartik, ekainaren 1etik, aurrera eskatu ahal izango da. Horretarako, hitzordua eskatu beharko da gizarte-langilearekin 945 161100 (doakoa) edo 010 (kostu txikia du) zenbakietara deituta.

Aurreikuspenen arabera, uda ondoren jakinaraziko zaie 2. eta 1. mendekotasun maila duten pertsonei bere garaian zehazten den datatik aurrera ordu kopurua handitzeko eska dezaketela.

“Oro har, etxeko arretan intentsitate handiena behar dutenak 3. mendetasun maila duten pertsonak direlako erabaki dugu horiekin hastea. Beharrezkoa da premiak banaka eta modu pertsonalizatuan baloratzea eta, horretarako, baliabideak eskarien arabera egokitu ahal izateko denbora behar da”, azaldu du Raimundo Ruiz de Escuderok, Gizarte Politiken zinegotziak.

Horrekin lotuta, zinegotziak gogorarazi du iazko abenduan, Udalak Etxerako Laguntza Zerbitzu berriaren kontratazioa onartu zuela. Aurrez ikusitakoaren arabera, hurrengo hilabeteetan jarriko dute funtzionamenduan. Kontratu berria ia 64 milioi euroren truke atera zen lizitaziora eta, Ruiz de Escuderoren hitzetan, “Etxerako Laguntza Zerbitzuaren kalitatea, intentsitatea eta gertutasuna hobetuko ditu. Aldaketa horren onurak, gainera, ez dituzte soilik erabiltzaileek jasoko. Izan ere, zerbitzu hori eskaintzen duten profesionalentzat (batez ere emakumeak) ere onuragarria izango da”.