Mikel Torres Eusko Jaurlaritzako bigarren lehendakariorde eta Ekonomia, Lan eta Enplegu sailburuak bidaia instituzionala hasi du Mexikora, Euskadiren eta Ipar Amerikako herrialdearen arteko harreman ekonomiko eta enpresarialak sendotzeko eta industria, enplegu eta ekonomia sozialaren arloan lankidetza bide berrietan sakontzeko.
Egonaldian, Torresek bilerak egingo ditu Mexikoko erakundeetako arduradunekin Diputatuen Ganberan, Mondragon Assembley eta Irizar moduko euskal enpresetako ordezkariekin eta kooperatibismoari, ekonomia sozialari eta esparru akademikoari lotutako eragile estrategikoekin, esaterako, Mondragon Mexiko Unibertsitatearekin, Jaurlaritzatik jakinarazi dutenez.
Lan agenda batez ere Queretaron eta Mexiko Hirian garatuko da. Bi guneek garrantzi berezia dute industria dinamismoagatik, inbertsioa erakartzeko gaitasunagatik eta euskal ekonomiarentzat funtsezkoak diren sektoreetan -automobilgintza, mugikortasuna, ingeniaritza aurreratua eta manufaktura- duten zeregin estrategikoagatik.
Bidaiaren ardatz nagusietako bat izango da kooperatibismoaren inguruko lankidetza bultzatzea, esparru horretan Euskadi nazioarteko erreferentzia baita enpresa lehiakortasuna, lurralde errotzea, berrikuntza eta gizarte kohesioa uztartzen dituen eredu ekonomikoari esker.
Era berean, bisitari esker, Mexikon lan egiten duten euskal enpresei laguntza instituzionala emango zaie, herrialdearen garapen industrial eta teknologikoari egiten dioten ekarpena aitortuz eta Euskadik atzerrian duen enpresa gaitasunaren enbaxadore gisa betetzen duen eginkizuna goraipatuz.
"Mexiko bazkide estrategikoa da Euskadirentzat, duen indar industrialagatik, dinamismo ekonomikoagatik eta epe luzera lankidetzarako aukerak sortzeko duen gaitasunagatik", nabarmendu du Mikel Torresek.
Lehendakariordeak azpimarratu duenez, Eusko Jaurlaritzak euskal produkzio sarea nazioartekotzeko eta lehentasunezko merkatuetan aliantza estrategikoak sortzeko duen konpromisoari erantzuten dio misio instituzional horrek.
"Gure enpresek eta kooperatibek nazioarteko merkatuetan duten presentzia indartzen jarraitu nahi dugu, haien hazkundean lagunduz eta inbertsio, lankidetza eta berrikuntza partekaturako aukera berriak bultzatuz", gaineratu du.
Era berean, euskal eredu ekonomikoaren balio bereizgarria nabarmendu du, oinarri industrial sendo batean eta erakundeen, enpresen eta gizarte eragileen arteko lankidetza estuan oinarrituta. "Euskadik erakutsi du posible dela oso eredu ekonomiko lehiakorra eraikitzea, aldi berean pertsonak erdigunean jarriko dituena. Gizarte ekonomia eta kooperatibismoa identitate horren parte dira eta erronka global handiei aurre egiteko etorkizuneko tresna dira", azaldu du.
KOOPERATIBAK
Bisitan zehar, Torresek balioa emango dio euskal kooperatiben ekosistemari enpresa formula moderno, erresiliente eta prestatu gisa, industriaren eraldaketa, digitalizazioa eta trantsizio energetikoa bezalako erronkei erantzuteko.
"Lehiakortasuna lankidetzan aritzeko, berritzeko eta konfiantza sortzeko gaitasunaren mende dago gero eta gehiago. Euskadik eta Mexikok bat egiten dute ikuspegi horrekin, eta asko dute elkarrekin eraikitzeko", ziurtatu du.
