Zierbenako Udalak (Bizkaia) Portuko hondartzako bainu eta solarium gune berria inauguratu du asteazken honetan. Erlaxatzeko, aisialdirako eta kirolerako gunea osorik birgaitu da, eta esku hartzeak milioi bat euro inguruko inbertsioa eskatu du.
Eugenio Mendikote Zierbenako alkateak azaldu duenez, espazioa birmoldatu egin da eta, horri esker, erabiltzaileek ur sakonetan bainatzeko eremu irisgarria izango dute edozein marea egoeratan, bai eta 1.200 metro koadro baino gehiagoko solarium eremua ere, itsasgoran arriskurik gabe erabil daitekeena sakonera txikiko uretan bainatzeko. Gainera, hasiera batean zegoen paisaia integrazioa berreskuratu da, bertan zegoen horma eraitsi delako.
Berroneratze lanak otsailean hasi ziren eta bost hilabetean egin dira. "Lanen garapenak bere konplexutasuna izan du. Obraren zailtasunik handiena materiala sartzea eta ateratzea izan da, pontona batetik edo garabiarekin egin behar izan baita Portu Agintaritzatik; eta, batez ere, uretara sartzeko azken tartea, urpekariekin eta itsasbehera handiekin bat etorriz egin behar zelako, eta horrek denbora tarte laburrak ematen zituelako lan egiteko", esan du alkateak.
Zierbenako alkateak nabarmendu du "ahalegin handia" egin dutela ingurua berregokitzeko eta biziberritzeko. Azaldu duenez, "proposatutako aldaketekin, aldi berean gune erakargarriagoa eta praktikoagoa sortzea lortu dugu. Gune babestua eta segurua geratu da, bai bainurako, bai eguzkia hartzeko, mareak alde batera utzita. Ziur nago jende asko hurbilduko dela gaur mundu guztiarentzat zabalik dagoen hondartza berri honetaz gozatzera".
