Ekoetxea Urdaibaik ekoizpen ekologikoaren metodo eta onurei buruzko erakusketa bat ireki du

Ekoetxea Urdaibaik Dena hobetzen da elikadura ekologikoarekin! izeneko erakusketa inauguratu du, Ekolurra Euskadiko Nekazaritza eta Elikadura Ekologikoaren Kontseiluak egiten duen euskal produktu ekologikoen sustapen ekintzen baitan. Erakusketaren helburua ekoizpen eta elikadura ekologikoaren ikuspegi osoa transmititzea da, ingurumenean dituen abantailak eta onurak azalduz, eta doan bisita daiteke, irailaren 26ra arte.

Busturian (Bizkaia) kokaturiko zentroko arduradunek jakinarazi dutenez, elikagai ekologikoen 61 ekoizle eta 373 hektarea zeuden 2001ean Euskadin, eta egun 740 operadore eta 11.000 hektarea daude. Edonola ere, nekazaritza ekologikoak hazten jarraitzen badu ere, Euskadiko nekazaritza lurren %5ek baino ez dute ekologia ziurtagiria.

Horrela, oraindik asko dago egiteko Europako Itun Berdearen Baserritik Mahaira estrategiaren helburua betetzeko, hau da, 2030ean lurren %25 ekologikoak izatea. "Egungo egoerak erakusten du Euskadiko nekazaritza ereduak bilakaera nabarmena izan behar duela datozen sei urteetan, helburua bete dadin", esan dute Ekoetxea Urdaibaitik.

Dena hobetzen da elikadura ekologikoarekin!' erakusketak 15 panel ditu, bat edo bi minutuko bideo laburrekin osatuta, eta bakoitzean jarritako QR kodeekin ikus daitezke. Ibilbide osoan, elikagaien ekoizpen ekologikoaren onurak nabarmentzen dira, besteak beste, ziklo naturalak errespetatzen dira, biodibertsitatea mantentzen da, ongarriak, herbizidak eta pestizida sintetikoak erabiltzea saihesten da, animalien ongizatea ziurtatzen da, ez dute transgenikorik onartzen, elikadura balio handiagoa sortzen da edota tokiko ekonomia bultzatzen da.