Bizikleta elektrikoak alokatzeko MugiBike sistema publikoak sendotzen jarraitzen du Vitoria-Gasteizen. Funtzionamenduaren lehen sei hilabeteetan 15.186 bidaia erregistratu dira, 64.000 kilometro baino gehiago egin dira eta erabiltzaileek gutxi gorabehera 6.000 orduz erabili dituzte.
Sareak 80 bizikleta ditu, hiriko hainbat tokitan banatuta, eta 64.000 kilometro baino gehiago egin ditu; hau da, sei hilabete eskasetan 800 kilometro baino gehiago bizikletaz, batez beste. Gainera, zerbitzuak 4,2 tona CO2 baino gehiago isurtzea saihesten lagundu du; hau da, ibilgailu batek 25.000 kilometro baino gehiago egitean sortzen dituen isurien kantitate baliokidea.
Beatriz Artolazabal alkateorde eta Espazio Publikoaren eta Auzoen zinegotziak oso modu positiboan baloratu ditu funtzionamenduan jarri zenetik igaro diren lehen hilabete hauek. “Gaur datuekin erantzun dezakegu. Eta erantzuna positiboa da. Oso positiboa. Izan ere, datuek erakusten digute MugiBikek gure hirian mugitzeko aukera berri gisa funtzionatzen duela, hazten ari dela eta sendotzen ari dela”.
Balantzearen alderdi nabarmenetako bat zerbitzuak abian jarri zenetik izan duen bilakaera da. Urtarrilean 1.474 bidaia izan ziren, eta maiatzean 3.677; hau da, sei hilabete eskasetan % 150 inguruko hazkundea izan du. Joera bera ikusten da gainerako adierazleetan ere. Egindako kilometroak urtarrilean 5.679 izatetik maiatzean 16.790 izatera igaro dira, eta erabilera-orduak, berriz, lehen hilabetean erregistratutako 557 orduetatik maiatzaren 1.552 orduetara igo dira.
Funtsezko beste adierazleetako bat bizikleta bakoitzeko erabilera kopuruarena da. Txandakatzeak ia hirukoiztu egin dira zerbitzua abian jarri zenetik, eta etengabe hazten jarraitzen dute. Gaur egun, sareak 180 joan-etorri inguru izaten ditu egunero, eta joan den ekainaren 7an goia jo zuen, bizikleta eta eguneko lau erabilerarekin.
