II. Science by Women biltzarra hasi da Gasteizen, Afrikako emakumeen ikerketa zientifikoa bultzatzea xede

Sciene by Women biltzarraren bigarren edizioa egin da aste honetan UNED urrutiko unibertsitateak Gasteizen duen zentro elkartuan. Afrikako emakumeen ikerketa zientifikoa bultzatzea eta haien proiektuak nazioartean ezagutaraztea du helburu Emakumeak Afrikaren Alde Fundazioak antolatutako topaketak, Gasteizko Udaletik azaldu dutenez.

Jardunaldiak hasteko ekitaldian Ana Lopez de Uralde Gasteizko Berdintasun eta Lankidetzarako zinegotziak hartu du parte, eta nabarmendu du "emakumeek sustatutako oso proiektu interesgarriak" ezagutuko direla biltzarrean.

"Proiektu horietan berrikuntzak oso leku garrantzitsua betetzen du. Zorroztasunetik, osotasunetik eta konpromiso sozialetik askotariko gaiak ikertu dituzten emakumeak. Gure neskatoek eta neskek zientziaren bidetik gidatuko dituzten erreferenteak behar dituzte, eta Science by Women bigarren biltzarrean, horietako asko izango ditugu", esan du.

ZIENTZIA

Emakumeak Afrikaren Alde Fundazioak Science by Women proiektua abiatu zuenetik, zientzia, teknologia, ingeniaritza edota matematika bezalako arloetan doktoreak diren 160 emakume ikertzailek hartu dute parte.

Emakumeak Afrikaren Alde Fundazioa irabazi asmorik gabeko erakunde pribatua da, 2012an sortua, eta bere helburu nagusia Afrikaren garapenean laguntzea da, emakumeei babesa eta laguntza emanez, haiek baitira kontinentearen aurrerapenaren eragile nagusiak.

Fundazioa demokraziarekin konprometituta dago eta gobernantzaren, bakearen, giza eskubideen eta garapen ekonomiko eta sozial jasangarriaren alde egiten du lan, eta hori guztia, "gizartea eraldatzeko faktore indartsuenetakoa den berdintasunaren ikuspegitik".