Gasteizko Udaleko gobernu bilerak onartu du 560.000 euro bideratzea eskola adineko seme-alabak dituzten gurasoentzako, 55 urtetik gorakoentzako, merkataritzako eta ostalaritzako langileentzako eta atzerritar jatorriko pertsonentzako euskara ikastaroak egiteko. Euskara Zerbitzuak antolatutako ekimena da, eta gizarte etxeetan, BIZAN sarean eta zenbait ikastetxetan egingo da.
"Eskaintza honekin, herritarrei euskara ikasteko aukera ematen diegu, ikasleen beharretara egokitzen diren maila desberdinetako ikastaroak eskainiz. Hainbat sektoretan euskara sustatzearen aldeko apustua ere berresten dugu", esan du Maria Nanclares Euskara arloko zinegotziak.
Gasteizko Udalak 20.000 euroko diru laguntza emango dio Araba Euskaraz Elkarteari
Era berean, Gasteizko Udalak 20.000 euroko diru laguntza emango dio Araba Euskaraz Elkarteari, bizitza sozialeko esparru guztietan eta hainbat ekintzaren bidez euskararen erabilera sustatzeko, besteak beste, Mugaezin lelopean aurten Olarizun egingo den Araba Euskaraz.
Bestalde, Izaskun Arrue Kulturgunerako azpiegitura eta ikus-entzunezko materiala hornitzeko eta instalatzeko kontratazio prozesuaren hasiera ere onartu du gobernu bilerak ostiral honetan, eta 215.000 euro inbertituko dira argiztapen eta soinuko oinarrizko egituretan, egungo agertokia osatzeko. Gainera, ikus-entzunezko ekipo bat erosiko da hitzaldi aretorako.
Azkenik, proiektu horrekin lotuta, Lazarraga Kultur Elkartearekin diru laguntza hitzarmena onartu da. Zenbatekoa 350.000 euro izango da, eta 2024an zehar Gasteiz Antzokia-Euskararen Etxea proiektua garatzera bideratuko da.
