Enplegatuak % 1,8 gehitu dira, enpresa-kopuruak behera egin arren

Eustaten datuen arabera, 2023ko urtarrilaren 1ean 149.070 enpresa zeuden Euskal Autonomia Erkidegoko jarduera-sektoreetan, hau da, aurreko urteetan baino 2.018 enpresa gutxiago (-%1,4). Enpresa horiek 166.587 establezimendutan jarduten zuten (fabrikak, dendak, bulegoak...), eta, hala eta guztiz ere, langile enplegatuen kopurua %1,8 igo zen. Lau sektoretan enplegua batez bestekoaren gainetik hazi zen: Informazioa eta komunikazioak (%4,8), Jarduera artistikoak eta beste zerbitzuak (%3,1), Jarduera profesional eta lagungarriak (%2,9) eta Eraikuntza (%2,2).

Landunen kopuruan jaitsierak izan dituzten sektoreen artean honako hauek nabarmentzen dira: Finantza jarduerak eta aseguruak (%2,8 gutxiago), Higiezinen jarduerak (%2,1 gutxiago) eta Nekazaritza, abeltzaintza eta arrantza (%2,0 gutxiago).

Egiturari dagokionez, sektorerik ugariena, establezimendu kopuruaren arabera, Merkataritza, garraio eta ostalaritza izan zen (%35,4). Ondoren Jarduera profesional eta lagungarriak (%16,3) eta, gero, Eraikuntza eta Administrazio publikoa, hezkuntza eta osasuna (%11,8).

Establezimenduen tamainaren araberako banaketa aurreko urtekoen oso antzekoa izan zen. Batez beste 50 langile edo gehiago dituzten establezimenduak 2.609 baino ez ziren, guztizkoaren %1,6, nahiz eta, oro har, enplegatuen guztizkoaren %42,1 okupatzen zuten. Hala ere, 119.809 establezimendu, ia hiru laurden, tamaina txikikoak ziren (3 langile baino gutxiago) eta langile guztien %15,5 biltzen zuten. Tamaina txikiko establezimendu horietan kontzentratu da enplegu-galera, 3.153 gutxiago. Enplegua, aldiz, 50 langile eta gehiagoko eta 20 eta 49 bitarteko geruzetan hazi zen gehien, 12.065 eta 4.355 enplegu irabazi baitzituzten, hurrenez hurren.

Establezimenduen batez besteko tamainari dagokionez, jarduera-adar handien arabera, enplegatuen kontzentrazio handiena Industria, energia eta saneamenduaren sektorean izan zen, 16,9ko batez besteko tamainarekin Euskal AE osoan. Araba 20,7 pertsonarekin nabarmendu zen; Bizkaian eta Gipuzkoan, berriz, 15,3 eta 16,8 pertsonakoa izan zen batez besteko tamaina, hurrenez hurren.

Sexuaren arabera, Euskal AEko enplegatuen %45,0 emakumeak izan ziren 2022an, aurreko urtean baino puntu erdi gehiago. Sektore feminizatuenak Osasun jarduerak eta gizarte zerbitzuak (%77,8 emakumeak), Hezkuntza (%67,4) eta Zerbitzuak (%62,6) izan ziren. Enplegua, aldiz, gehienbat maskulinoa da Eraikuntzan (%89,2) eta Industrian eta Lehen Sektorean (%79 inguru bi kasuetan).