Emakumeen Araba World Tennis Tour txapelketaren bosgarren edizioa jokatuko da Gasteizen uztailaren 14tik 21era

Emakumeen Araba World Tennis Tour txapelketaren bosgarren edizioa jokatuko da Gasteizen uztailaren 14tik 21era bitartean. Peña Vitoriana tenis klubaren instalazioetan izango da, eta aldi berean beste jarduera batzuk ere antolatu dira.

Txapelketaren berri eman dute asteazken honetan San Migeleko balkoian egindako agerraldian, eta bertan izan dira Gasteizko Udaleko Kirol eta Osasun zinegotzi Ana Lopez de Uralde, Arabako Aldundiko Kultura eta Kirol diputatu Ana del Val eta Peña Vitoriana tenis klubeko presidente Iñigo Area eta gerente Alberto Gonzalez.

"Denbora gutxian, Euskadiko onena eta Espainiako onenetako bat bihurtu da"

Emakumeen Araba World Tennis Tour ITF $100.000 txapelketa da, eta, Lopez de Uraldek nabarmendu duenez, "denbora gutxian, Euskadiko onena eta Espainiako onenetako bat bihurtu da, eta nazioarteko tenis jokalari onenen jokoaz gozatzeko aukera emango digu".

Izena emateko epea ostegunean zabalduko da, ekainaren 27an, eta antolakuntzak banakako eta binakako txapelketen artean 80 tenislari biltzea espero du. Parte hartuko duten tenis jokalarien profila altua izango da, eta emakumezkoen munduko sailkapeneko 100. postutik aurrerakoak izango dira Gasteizen.

Txapelketarekin batera beste era bateko jarduerak ere egingo dira, hala nola uztailaren 5ean Probintzia plazan egingo den 'Tennis Street', ikastetxeetako saioak, kirolaren balioei buruzko hitzaldi bat, adingabeentzako jarduerak eta entrenamenduak eta gurpil aulkian jokatutako tenis erakustaldia, bertatik ondorioztatu dutenez.