Eskola-kiroleko 275 talde Gasteizen

Jarduera horiek udal-instalazioetan egiten ari dira, segurtasun-neurriekin kutsatzea saihesteko eta prebenitzeko

03.11.2020 | 01:12
Futboleko haurren entrenamendu baten artxiboko irudia. Argazkia: Pilar Barco

GASTEIZ– Eskola kiroleko 275 talde jarduerak egiten ari dira udal kirol instalazioetan, Gasteizko Udalak atzo azaldu zuenez. Hala ere, jarduera horiek hainbat prebentzio-neurrirekin egiten ari dira, birusa lurraldean zehar zabaltzea geldiarazteko. Neurri horien artean dago, adibidez, lehiaketak egitea debekatzea.

Hala, joan den hilaren bukaeran eskola-kirolaren programa baimendu zenez geroztik, Gasteizko Udalaren ekipamendu-sarean 40 kirol-modalitatetik gora praktikatzea ahalbidetu du entitateen, federazioen eta Udaleko Kirol Zerbitzuaren arteko elkarlanak: "Ehun entitate baino gehiago dira eskola-kirolean dihardutenak, eta saskibaloia, gimnasia eta futbola dira gehien praktikatzen diren modalitateak, beste askoren artean, hala nola igeriketa, aerobika, mahai-tenisa, karatea, judoa, esgrima eta abar. Hori posible egiteko, jarduera egingo duten instalaziora egokitutako ekintza-plana aurkeztu behar izan dute kirol-entitateek, segurtasun sanitarioaren arloan Udalak ekipamendu bakoitzerako eman dituen zehaztapenetara moldatua", jakinarazi zuten. Baldintzek horretarako aukera ematen badute, hurrengo egunetan udal-instalazioen sarean jardungo duten eskola-kiroleko taldeen kopuruak gora egiten jarraitzea espero da "bai baitira 57 entitate, eskabidea egin badute ere oraindik ekintza-plana aurkeztu ez dutenak. Era berean, 70 entitatek oraindik ez dute aurkeztu Eskola Kirolaren Programan parte hartzen dutenei Arabako Foru Aldundiak ematen dien dokumentazioa", iragarri dutenez.

egungo egoera "Jakitun gara, zein egoera bizi duen kirolak pandemiaren ondorioz, bereziki eskola-kirolaren esparruan lan egiten duten entitate eta pertsonek. Ahalegin handia egin dute, kirola egiten jarraitu ahal izateko aparteko baldintzetara moldatzeko, eta gaur egun 275 talde dira kirola egiten ari direnak, horrek heziketaren, osasunaren nahiz gizarte-integrazioaren arloan dakartzan onura guztiekin", adierazi zuen Kirol eta Osasun zinegotzi Livia Lopezek. Talde bat baino gehiago izan ahalko da aldi berean eta arduradun berak talde bat baino gehiago eduki ahal izango du. "Egoera sanitarioa aldakorra da, eta ezin dugu ahaztu larriagotzen bada neurri murriztaileagoak hartu beharko ditugula, baina, ahal den bitartean, Udalak, kirol-entitateekin batera, bere esku dagoen guztia egingo du".