Gasteizko Udaleko gobernu batzordeak hiriko merkataritza sustatzeko bi hitzarmen onartu ditu, eta guztira 106.000 euro banatuko ditu urtean zehar egin beharreko dinamizazio jardueretarako.
Lehen hitzarmenaren arabera, 98.000 euro emango zaizkio Erdi Aroko Hiriguneko Merkataritza eta Zerbitzu Elkarteen Federazioari (FEDASOC), jendea Alde Zaharrera eta bertako merkataritza eta ostalaritza eskaintzara erakartzeko jarduerak antolatzeko.
"Alde Zaharra leku dinamiko, aktibo eta eskaintza komertzial berezitu gisa sustatu nahi dugu"
"Alde Zaharra leku dinamiko, aktibo eta eskaintza komertzial berezitu gisa sustatu nahi dugu. Akordio honen bidez, xarma handia duen auzo honetako tokiko merkataritzan erosketak egitea sustatu nahi dugu", azaldu du Ekonomia Sustapen, Enplegu, Merkataritza eta Turismoko zinegotzi Maria Nanclaresek.
Horrela, diru laguntzak hainbat ekitaldi antolatzeko balioko du, hala nola Almendrako Azoka (hileko lehen larunbatean egiten da), Uda Fest musika, moda eta gastronomia uztartzen dituen hitzordua, eta Kandelen Gaua, Gabonei ongietorria egiteko Alde Zaharrari kutsu magikoa ematen dion ekimena. Gainera, hirigune historikoaren eta Gabonetako kanpainaren merkataritza sustapenerako kanpaina finantzatuko da.
Gasteizko Udaleko gobernu bilera adostutako bigarren hitzarmena 2024ko Visual Sariak antolatzera bideratuko da. Arabako Merkataritza, Industria eta Zerbitzu Ganberak lurraldeko merkataritza, turismo, ostalaritza eta zerbitzuen sektoreko enpresek beren irudi komertzialari dagokionez egiten duten lana aitortzeko sariak dira, eta 8.000 euro izango dira xede horretarako.
