Arabako Foru Aldundiak hainbat inbertsio bultzatzen jarraituko du lurraldeak Gasteizen duen ikusgaitasuna handitzen laguntzeko eta, gobernu kontseiluak onartutako hitzarmen baten bidez, 2,5 milioi euro emango dizkio hiriko diru kutxari, Gasteizko Udalak azpiegiturak eta lurraldean eragina duten inbertsioak bultza ditzan.
Ramiro Gonzalez Arabako ahaldun nagusiak azaldu duenez, diru laguntza hau Gasteizi mota guztietako zerbitzu publikoei aurre egiten laguntzeko helburuarekin sortu zen, zerbitzu horien ohiko erabiltzaileak Gasteizen bizi ez diren arabarrak baitira, hiriburuko herritarrez gain.
Zerbitzu horien ohiko erabiltzaileak Gasteizen bizi ez diren arabarrak dira
Testuinguru horretan, Arabako Aldundiko Lurralde Orekako Sailak, lurraldean zerbitzu azpiegiturak garatzeko eskumena izanik, Gasteizen kokatuta egon arren Arabako zerbitzu publikoen kalitatea bere osotasunean hobetzeko balio duten azpiegiturak garatzen lagundu nahi du. Helburu horrekin, diru laguntzak azpiegitura berrietan zein lehendik daudenetan egiten diren inbertsioak finantzatuko ditu.
Horrela, hitzarmenak balioko du Gasteizen bizi ez diren arabarrek ere erabiltzen dituzten kultura, kirol eta aisialdiko zerbitzu publikoak eta hezkuntza, osasun edo garraio azpiegiturak berresteko.
Bada, aurten egingo diren jardueren artean daude Lazarraga Kultur Elkartearen kultura ekipamendurako (150.000 euro) eta Gardelegiko zabortegiko inbertsioak (750.000 euro), haurrentzako jolas parkeetan (150.000 euro) eta kirol instalazio, kultura etxe, futbol zelai eta igerilekuetan inbertsioak egitea (600.000 euro) edota industrialdeetarako inbertsioak, eraberritzeak eta asfaltatzeak (500.000), besteak beste.
