- Eusko Jaurlaritzak asteak daramatza hainbat gomendio jarraitzeko beharra azpimarratzen, koronabirusari bere egitekoa zail jartzeko. Eusko Jaurlaritzako Osasun sailburu Nekane Murgak atzoko prentsaurrekoa baliatu zuen, berriz ere, herritarren laguntza beharrezkoa dela azpimarratzeko, eta, dagoeneko ezagunak diren neurriak gogorarazteaz gain (maskara erabiltzea, esaterako), herritarrei inplikazio handiagoa eskatu zien neurri berriekin.

"Testuinguru berri bati eta arrisku egoera berriei aurre egin behar diegu. Orain, gure hirietara eta herrietara itzultzen garenean, hainbat astetako oporraldiaren ondoren, pertsona talde berriekin topo egingo dugu, hirigunera gehiago joango gara eta beste aisialdi-gune batzuetara joango gara", azaldu zuen eta gaineratu zuen: "Ildo horretan, guztiok babesten lagun diezaguketen zenbait gomendio gogorarazi nahi ditut, bereziki datozen asteei begira, ohiko jarduera berrietara itzuliko baikara". Horren harira, kutsatzeak gertu dauden pertsonen artean gertatzen direla gogorarazi zuen, "beraz, leku jendetsuetara joatea saihestu behar da". "Jende gutxien ibiltzen den orduetan, erosketak egitera, parkera edo paseatzera ateratzen saiatu behar dugu", gogorarazi zuen. Gainera, eskuak maiz garbitzearen garrantzia ere azpimarratu zuen, bereziki, gune komunak ukituz gero. Establezimenduei eta ostalaritzari dagokienez, azpimarratu zuen edukiera errespetatu behar dela dagoen leku guztietan, eta maskara behar bezala jarrita eduki behar dela. Familia-inguruneari dagokionez, sailburuak eskatu zuen herritarrek ez dezatela ahaztu maskara etxe barruan ere erabili behar dela, familia-ingurunetik kanpo bisitak jasotzen direnean. "Etxean ere erne ibili", esan zuen: "Aireztapen egokia eta distantziak eta maskarak mantentzea beharrezkoak dira elkarrekin bizi ez garen pertsonekin elkartzen garenean. Zaindu ditzagun arriskuko pertsonak". Auzokoen komunitateetan egin beharreko lana ere aipatu zuen. "Auzokoen komunitateek ere lagundu dezakete transmisioaren prebentzioan, jende gehien ibiltzen den eremuetan gehiago garbituz".

Azkenik, ostalaritzako 50 enpresa-elkarte Madrilgo Cibeles plazan bilduko dira irailaren 9an 11:00etan, Hostelería España eta Hostelería Madrid elkarteek antolatutako ekitaldi batean, ostalaritza-sektorea bizitzen ari den egoeraren eta Estatuko Gobernuak sektoreari laguntzeko planetan duen "zehaztasun faltaren aurrean sentsibilizazio- eta protesta-lana egiteko". Euskaditik, "SEA Ostalaritza, Madrilera joango da, Gipuzkoako Ostalaritza eta Bizkaiko Ostalaritza Elkartearekin batera. Zuzendaritza batzordeetako dozena erdi bat kide izango dira bertan, sektoreko enpresen hondamenetik salbatzeko eta langileen langabezia saihesteko laguntza-neurriak aldarrikatzeko", adierazi zuten atzo SEAtik.