Euskal Autonomia Erkidegoko (EAE) ondasunen esportazioek %4,9ko urte arteko hazkundea izan dute apirilean, 2.537 milioi eurokoak izan ondoren, aurreko urteko hilabete bereko 2.419 milioi euroen aldean. Ondasun energetikoen esportazioak %38,4 handitu dira, eta ez-energetikoenak %3,6, Eustat euskal estatistika erakundearen datuen arabera.

Lurraldela, esportazioek %9,9 egin dute behera apirilean Araban; Bizkaian eta Gipuzkoa, aldiz, esportazioak hazi egin dira apirilean, %15,9 eta %7,0, hurrenez hurren.

Ondasunen inportazioei dagokionez, 2.644 milioi eurora iritsi dira apirilean EAEn, aurreko urteko hil berean baino %18,1 gehiago. Inportazio energetikoak %21,1 hazi dira, eta ez-energetikoak %16,9. Arabako inportazioak %4,3 hazi dira, Gipuzkoakoak %20,8 eta Bizkaikoak %22,4.

Modu honetan, apirileko merkataritza saldoa negatiboa izan da (-106,8 milioi euro), eta estaldura tasa %96,0koa da. 2022ko abendura jo behar da zeinu horretako emaitza aurkitzeko (hiru hilabete saldo negatiboarekin). Saldo negatibo handienak 2006an erregistratu ziren (bederatzi hilabetetan inportazioak izan ziren nagusi).

Bestalde, EAEko esportazioek %11,5eko beherakada erregistratu dute 2024ko lehenbiziko lau hilabeteetan aurreko urteko aldi beraren aldean. Esportazioen guztizko bolumena 10.066,4 milioi eurokoa izan da, 2023ko lauhileko berean baino 1.309 milioi euro gutxiago.

Bizkaiko esportazioak izan dira EAEko handienak apirilean, 3.896,9 milioi eurorekin; Gipuzkoak 3.173,9 milioi euro metatu ditu esportazioetan, eta Arabak 2.995,5 milioi. Produktu mota kontuan hartuta, produktu ez-energetikoak izan dira ugarienak, 9.432,7 milioi esportatu baitituzte.

Inportazioei dagokienez, 9.151,4 milioi euro ingurukoak izan dira urtarriletik apirilera, aurreko urteko aldi berean baino 214,6 milioi euro gutxiago. Produktu ez-energetikoen inportazioa %6,6 jaitsi da, eta produktu energetikoena %10,3 igo.

EAEn izandako inportazioen jaitsiera Araban izandako %9,1eko beherakadak eragin du hein handi batean (1.903,8 milioi euroko inportazio metatuak, iaz baino 190 milioi gutxiago). Gipuzkoan ere inportazioek atzera egin dute, 36 milioi gutxiago izan baitira, guztira 1.756,8 milioira iritsiz; Bizkaian, aldiz, gehitu egin dira (11,6 milioi gehiago), eta guztira 5.490,8 milioi eurora heldu.

Modu honetan, EAEko ondasunen kanpo merkataritzak 914,9 milioi euroko saldo positiboa izan du 2024ko urtarriletik apirilera, eta estaldura tasa %110,0 izatera heldu da.