Gizarte eragin positiboa duten hiru proiektu berritzaile saritu ditu BBK Ekin programak

BBK Ekin programaren laugarren edizioak gizarte eragin positiboa duten eta oraindik hasierako fasean dauden hiru proiektu berritzaile saritu ditu. Zehazkiago, Ziortza Llano (Tipi-Tapa), Omar Santiago Mayorga eta Johan Esteban Garcia (Cobbler Materials) eta Idoia de Prado (BirGozo) ekintzaileen negozio ideiek jaso dute BBKren bultzada.

Enplegua sortzea

Inkubazio fasean dauden enpresei laguntzeko BBK Fundazioaren BBK Ekin programak enplegua sortzea eta Bizkaian gizarte berrikuntzarako aukerak garatzea du helburu, bere arduradunek jakitera eman dutenez.

Hiru ekimen irabazleak joan den ostiralean aurkeztu ziren BBK Ekin Demo Day jardunaldian, non programako 11 proiektu finalisten pitch saioak entzun ahal izan ziren zuzenean. Veronica Urda BBK-ko Inpaktu arduraduna, Pere Cordon Bridge for Billlions-eko ordezkaria eta Isabel Abascal BBK Ekin 2023ko proiektu irabazlea izandako Compostree-ko CEO eta sortzailea izan dira epaimahaikideak.

Lehen saria, 10.000 eurokoa

Lehen saria, 10.000 eurokoa, Ziortza Llanok jaso du Tipi-Tapa proiektuagatik. Zaldiekin lagundutako terapiako zentro monografiko bat da, dibertsitate funtzionala duten pertsonen eta haien familien bizi kalitatea hobetzeko, animalien ongizatea eta ingurumenaren zaintza sustatzen dituen ingurune natural batean.

Omar Santiago Mayorgak eta Johan Esteban Garciak jaso dute 5.000 euroko bigarren saria, Cobbler Materials proiektuagatik. Geruza anitzeko material geokonposite polimeriko berri baten garapenean oinarritzen da, eta hondakinak maneiatzen dituzten enpresetan erabiltzeko da, hala nola zabortegi, araztegi eta zentral termikoetan.

Hirugarren eta azken saria, 2.500 eurokoa, Idoia de Pradoren BirGozo ekimenarentzat izan da. Elikagaien enpresa bat sortzeko proiektua da, eta elikagaiak alferrik galtzearen aurka borrokatzen du edari begetalen ekoizpen industrialean sortutako azpiproduktuen balioa handituz gozogintza osasungarrian osagai sinple eta naturalekin, glutenik gabe eta 'plant-based'.

BBK Ekin programak 25 proiektu babestu ditu aurten

BBK Ekin programak 25 proiektu babestu ditu aurten, eta, urtarrilean hasi eta hurrengo bost hiletan, finantzaketa zailtasunak zituen negozio hasiberri bat "negozio eredu sendo eta iraunkor eta gerora bere eskalagarritasuna ahalbidetuko duena" bihurtu ahal izan dute guztiek. Programatik igaro ostean, aukeratutako 25 proiektuek beren negozio plana garatu dute eta laburpen exekutibo bat prest dute inbertitzaile izan daitezkeenei aurkezteko.

BBK-k 100.000 euroko inbertsioa bideratu du programara. Urtero 100 pertsonak baino gehiagok parte hartzen dute eta banku fundazioak prestakuntzara eta enpresak sortzera bideratutako programez baliatzen dira. Lurraldearen lehiakortasun jasangarriaren aldeko apustuan eta Garapen Jasangarrirako Helburuen ildotik, ekintzailetza bultzatzea da BBKren gizarte ekintzaren ildo estrategikoetako bat.