Eusko Jaurlaritzako Osasun Sailak, Arabako Foru Aldundiak eta Arabako Farmazialarien Elkargoak hitzarmena sinatu dute astelehen honetan, Añanako eta Arabako Mendialdeko eskualdeetan sendagaiak etxez etxe emateko 'Botika etxean eskura' ekimena martxan jartzeko.
Gotzone Sagardui Eusko Jaurlaritzako jarduneko Osasun sailburuak, Anartz Gorrotxategui Arabako Aldundiko Lurralde Orekako eta Lurralde Antolaketako diputatuak eta Milagros Lopez de Ocariz Arabako Farmazialarien Elkargoko presidenteak izenpetu dute akordioa.
Proiektu pilotuaren helburu nagusia da sendagaiak etxez etxe ematea eta arreta farmazeutiko hobea eskaintzea bi eskualdeotan bizi diren pertsonei, pazienteari agindutako sendagaiak bere medikuak ezarritako jarraibideen arabera jasotzen lagunduz, medikazioaren erabilera berrikusiz eta kontrolatuz, eta sendagaien erabilerarekin lotutako emaitza negatiboak prebenitzeko edo saihesteko arazoak identifikatuz.
Hitzarmena astelehen honetan bertan sartuko da indarrean, bi urteko indarraldiarekin, eta Eusko Jaurlaritzako Osasun Sailak eta Arabako Foru Aldundiko Lurralde Oreka eta Lurralde Antolamendu Sailak finantzatuko dute proiektua, urteko 125.000 euroko ekarpenarekin (Jaurlaritzak 95.000 euro eta Arabako Aldundiak 30.000 euro).
Sagarduik azaldu du ekimen aitzindaria dela, erakundeen arteko lankidetzaren emaitza, eta sendagaiak etxez etxe emate hutsetik harago doala, Arabako landa eremuko biztanleen arreta eta jarraipen farmakoterapeutikoa hobetzen baitu beren etxeetan.
Era berean, tratamenduarekiko atxikimendua indartzeko eta, hala badagokio, dosifikazio sistema pertsonalizatuak prestatzeko balioko duela esan du, baita Osakidetzako Lehen Mailako Arretako profesionalei tratamenduaren edo pazienteentzat garrantzitsuak diren beste alderdi batzuen inguruan garrantzitsutzat jotzen diren oharrak jakinarazteko ere.
