Arabako Aldundiak lurraldeko turismo eskaintza aurkeztuko du Frantzia, Portugal, Belgika eta Italian

Arabako Foru Aldundiak lurraldea turismo helmuga gisa sustatuko du aurten "Europako lau merkatu estrategikotan", Frantzia, Portugal, Belgika eta Italian, hain zuzen ere. Halaber, natura, ondare eta enogastronomia eskaintzaren berri emango du Espainiako Estatuko zenbait hiritan, hala nola Sevilla, Valentzia, Alacant eta Valladoliden.

Cristina Gonzalez Enplegu, Merkataritza eta Turismo Sustapenaren Saileko foru diputatuak 2024an programatutako turismo sustapeneko ekintzak azaldu ditu asteazken honetan Arabako Batzar Nagusien osoko bilkuran, eta lurralderako bidaia paketeak diseinatzeko proiektu berri bat ere iragarri du, bidaia agentzia eta antolatzaileetan merkaturatzeko.

Azaldu duenez, Arabako Foru Aldundiak eta Gasteizko Udalak joan den martxoan aurkeztu zieten turismo norakoa Madril, Bartzelona eta Zaragozako komunikabideei, bidaia agentziei eta azken bidaiariei. Horretarako, Arabako turismo baliabide garrantzitsuenen irudiak zituen trailer tematizatu bat eta turismo bulego bat jarri ziren kaleetan.

Trailer eta turismo bulego ibiltari hori Donostian izan da aste honetan bertan, eta datorrenean Bilbon izango da, "gure aldameneko gipuzkoar eta bizkaitarrei Arabako eskaintza erakutsi eta haiek erakartzeko".

"Aurrerago, udazkenean, Sevillan eta Alacanten aurkeztuko dugu helmuga, Forondarekin aireko konexio zuzena duten hirietan; Valentzian, Arabara bidaiariak igortzen dituzten autonomietatik laugarren merkatua; eta Valladoliden, probintzia horretatik eta Gaztela eta Leon osotik hurbileko turismoa indartzeko", azaldu du.

Kanpo merkatuei dagokienez, foru diputatuaren hitzetan, "Frantzia eta Portugal jorratuko ditugu, Arabara turistak bidaltzen dituzten atzerriko bi merkatu nagusiak direlako, bai eta Italia eta Belgika ere, hegazkin bidez Gasteizekin konektatuta baitaude. Kanpaina uda ostean zabalduko da, Toulouse hirian helmugaren zuzeneko aurkezpen bat eta Frantziako hedabideekin 'press-trip' bat eginez".

Era berean, esan du Enplegu, Merkataritza eta Turismo Sailak iaz Portugalgo helmugaren aurkezpenean sortutako harremanak aprobetxatuko dituela herrialdearen sustapenari jarraipena emateko, sustapen eta publizitate ekintzak egingo dituela Charleroiko aireportuan (Belgika), eta workshop batean parte hartuko duela Bergamon (Italia).