Euskal herritarren bizi-kalitatea hobetzeko eta berdintasuna sustatzeko ahalegin etengabean, Eusko Jaurlaritzak jakinarazi du Zainketen aldeko Aliantza Globalean sartuko dela. Nazioarteko ekimen horren bidez, zainketen lana aitortu, baloratu eta lagundu nahi da, gizonek zein emakumeek beste pertsona batzuk zaintzeko erantzukizun partekatua dutela bermatuz.
Nerea Melgosa Eusko Jaurlaritzako Berdintasun, Justizia eta Gizarte Politiketako sailburuak adierazi du pozik dagoela Aliantzarekin bat egiteagatik, eta azpimarratu du “urrats erabakigarria dela gizarte bidezkoago eta berdintasunezkoago bat lortzeko bidean aurrera egiteko. Zainketen aldeko Aliantza Globalarekin bat egitean, euskal herritar guztien ongizatearekiko konpromisoa berresten dugu, eta sistema iraunkor eta inklusiboa eraikitzen jarraitzen dugu”.
“Eusko Jaurlaritzak Aliantzan duen parte-hartzeak beste kide batzuekin batera lan egitea ekarriko du, esperientziak, estrategiak eta praktika onak partekatzeko. Gainera, zainketen arloan politika publiko inklusibo eta bidezkoagoak garatzen eta indartzen lagunduko duten baliabide eta ezagutza espezializatuetara iristeko aukera emango digu”, azaldu du Melgosak.
Zainketen aldeko Aliantza Globala NBE Emakumeak-ren lankidetza-ekimena da, eta gobernuak, gizarte zibileko erakundeak, enpresak eta beste eragile batzuk biltzen ditu zainketa-sistemak aldatzeko.
Aliantza lanean ari da desberdintasunak oztopatzen dituen zainketa-kargari aurre egiteko eta etxeko lanaren eta zainketen inguruko kultura eraldatzeko (pertsona guztientzat irisgarriak, eskuragarriak eta kalitatekoak direla ziurtatuz), eta sektorean lan-baldintza duinak bermatzeko ere lan egiten du.
Zainketei buruzko I. Biltzarra
Eusko Jaurlaritzak Zainketei buruzko Kongresuaren lehen edizioa egingo du azaroaren 15ean eta 16an, zainketen gizarte-antolaketarako eredu publiko batean oinarritutako euskal itun baterantz aurrera egiteko, gaur egungo eta etorkizuneko gizartearen erronkei aurre egiteko pertsonalizatua eta komunitarioa.
Donostiako Tabakalera gunean egingo da kongresua, eta Iñigo Urkullu lehendakariak inauguratuko du, Gipuzkoako diputatu nagusi Eider Mendozarekin eta Eneko Goia Donostiako alkatearekin batera.
Euskadik bi hamarkada daramatza urrats sendoz zainketen gizarte-antolaketarako eredurantz, non erantzukizuna eta lidergoa sektore publikoari baitagokio. Denbora horretan, osasun-, hezkuntza- edo gizarte-zainketak indartu dira, eta prestazio- eta zerbitzu-zorroak zehaztu eta zabaldu dira. Horien guztien ezaugarria izan da berdintasunean, lidergo publikoan, lankidetzan, kalitatean eta jasangarritasunean oinarritutako komunitate-zainketen ereduranzko trantsizioa.
Ibilbide horretan lortutako esperientziari eta aurrerapenei dagokienez, iritsi da euskal itun baterantz aurrera egiteko unea. Itun horrek arreta komunitarioa sistema tradizionalen alternatiba gisa definitzen du, eta sistema horiek zainketa-lanaren erantzukizuna familiei egozten diete, batez ere emakumeei, baina hori bidegabea da, pertsonen arteko desberdintasunean sakontzen baitu.
Zainketei buruzko I. Biltzarrak gogoetarako espazioak eskainiko ditu, hitzaldien eta eztabaida-mahaien formatuan, zainketen arloan gaur egungo eta etorkizuneko erronkak identifikatzeko, politika publikoak ebaluatzeko, zaintza hobetzeko eta erronka demografikoari erantzuteko estrategiak diseinatzeko, eta zainketen euskal ereduaren inguruan adostasun zabala lortzeko.
Lehen jardunaldia. Azaroaren 15a, asteazkena
Flaviana Teodosiuk, Europako Batzordeko iraupen luzeko zainketa-taldearen arduradunak, Kongresua irekiko du asteazkenean, azaroaren 15ean, Zainketen Europako estrategia izeneko inaugurazio-txostenarekin. Bestalde, José Luis Fernández (London School of Economics eskolako irakasle elkartua eta Care Policy and Evaluation Centre zentroko zuzendaria) izango da Europan iraupen luzeko zainketen erronkei buruzko ponentziaren hizlaria. Bi ponentzia horiek bi saio-multzo aldi berean proposatzen dituen lehen jardunaldiari ematen diote garrantzia.
Lehenengo multzoak hiru saio ditu zainketa-politikei, trantsizio demografikoari eta Euskadiko Hirugarren Sektore Sozialaren ekarpenari ekiteko. Bigarren multzoan, ikaskuntzak eta praktika onak partekatuko dira, bi ikuspegitatik: komunitateko zaintza eta egoitzako zaintza. Parte-hartzaileek multzo bakoitzean modu paraleloan garatuko diren proposamenetako bat aukeratu beharko dute.
Lehenengo eta bigarren blokeen artean eztabaida-mahai bat irekiko da, zainketa-eredu pertsonalizatuago eta komunitario baterantz nola egin hausnartzeko.
Bigarren jardunaldia. Azaroaren 16a, osteguna
Nerea Melgosa Eusko Jaurlaritzako Berdintasun, Justizia eta Gizarte Politiketako sailburuak emango dio hasiera Biltzarraren bigarren jardunaldiari, Zainketa eskubideekin, askatasunean eta berdintasunean zaindu. Zainketei buruz Euskadin akordioa lortzeko oinarriak ponentziarekin.
Lehenengo multzoak bi saio ditu, desberdintasunetan sakontzen duen eredu tradizional baten gakoak jorratzeko: nola desfamiliartu eta desfeminizatu zainketa-lana? Nola bermatu kalitatea eta nola sustatu ebaluazioa eta berrikuntza? Bigarren multzoak bi saio proposatzen ditu zainketen iraunkortasunari buruz galdetzeko: nola bermatu zainketa etiko eta jasangarria ikuspuntu pertsonal eta sozialetik? Nola bermatu zainketa eskuragarriak eta ekonomikoki jasangarriak? Ondorioen mahai baten ondoren, Lide Amilibia Eusko Jaurlaritzako Berdintasun, Justizia eta Gizarte Politiketako sailburuordeak emango dio amaiera zainketei buruzko I. Biltzarrari.
Kongresura joateko plazak mugatuak dira eta izena ematea doakoa da. Interesdunek www.congresocuidados.eus.web orriaren bidez eman behar dute izena.
