Esther Apraiz Eudel Euskadiko Udalen Elkarteko buru eta Derioko alkateak Europako Udalerrien eta Eskualdeen Kontseiluko liderren goi bileran parte hartuko du ostegun honetan eta ostiralean, ekainaren 4an eta 5ean, ehun arduradun politiko ingururekin batera Finlandiako Rovaniemi hirian, erakunde demokratikoek Europan dituzten erronka handiei aurre egitea helburu.
Eudelek jakinarazi duenez, ostiralean, Bilboko Udaleko zinegotzi Eider Inuntziagak Hirien eta Tokiko Gobernuen munduko sarearen panelean parte hartuko du, Europako Udalerrien eta Eskualdeen Kontseiluko Tokiko Demokraziaren bozeramaile moduan.
Udal elkartearen arabera, Eudelek eta Bilboko Udalak goi bilera honetan parte hartuz, "indartu egingo da EAEko udalerriek Europaren eraikuntzarekin eta tokiko gobernantza sendo, berritzaile eta hurbilekoarekin duten konpromisoa, aktiboki esku hartuko baitu tokiko politiken etorkizuna Europan eta nazioartean markatuko duten eztabaidetan".
Europako Udalerrien eta Eskualdeen Kontseiluaren 75. urteurrenaren baitan, goi bileran, ziurgabetasuna, gizarte eraldaketak, klima erronkak eta herritarrek erakunde demokratikoeekiko konfiantza indartzeko beharrak eragindako testuinguruan, tokiko gobernuek duten zeregina aztertuko dute.
Ostegun honetako saio nagusia arratsaldean izango da, 'Prospektiba eta prestakuntza: gobernantza demokratikoa indartzea' izenburupean. Eztabaida politikoaren ardatza izango da tokiko gobernuek arriskuei aurrea nola hartu, erakundeen arteko koordinazioa nola indartu eta herritarrekiko hurbil dauden zerbitzu publiko sendoak izatea nola bermatu.
Eudeleko elkarteburuak Suediako, Portugalgo eta Estoniako udal ordezkariekin parte hartuko du eztabaida horretan. Saioari hasiera emateko hitza hartuko du Finlandiako lehen ministrorde izandako Katri Kulmuni eurodiputatuak, eta, besteak beste, krisien aurreko prestakuntza, udal politiken plangintza, zibersegurtasuna, gizarte kohesioa eta herritarren parte hartzea landuko ditu.
Esther Apraizen esanetan, "egungo erronkak aintzat hartuta, hala nola etxebizitzaren krisia, aldaketa demografikoa, larrialdi klimatikoa edo desinformazioa, hobeto prestatutako tokiko erakundeak behar dira, herritarrekin elkartuagoak eta elkarlanean aritzeko gai direnak. Etorkizuneko gobernantza demokratikoa gure hiri eta udalerrietan eraikitzen da orain".
Era berean, Eudeleko elkarteburuak nabarmendu duenez, "Europak udalak behar ditu bazkide estrategiko moduan. Gu gara politika publikoak pertsonentzako emaitza jakin bihurtzen ditugunak, eta konfiantza demokratikoari hurbiletik sostengatzen diogunak".
