Tuberkulosi kasuetarako protokoloa aktibatu dute EHUn kasu bat hauteman ondoren

Eusko Jaurlaritzako Osasun Sailak eta Osakidetzak tuberkulosi kasuetarako protokoloa aktibatu dute neurri prebentibo gisa, Osasun Saileko Osasun Publikoko Zuzendaritzako Epidemiologia Unitatearekin lankidetzan, Euskal Herriko Unibertsitateko (EHU) Zientzia eta Teknologiako Fakultatean gaitzaren kasu bat hauteman ondoren.

Horrela, Euskal Autonomia Erkidegoko (EAE) osasun publikoko arduradunek jakinarazi dutenez, 70 kontaktu identifikatu dira, irakasleak zein ikasleak, eta datozen egunetan aztertuko dira. Prozeduraren helburua da balizko kasu berriak baztertzea eta pertsona guztien osasunaren babes egokia bermatzea.

Kontaktuen azterketa Jaurlaritzako Osasun Publikoko Zuzendaritzaren Euskadin Tuberkulosia Prebenitzeko eta Kontrolatzeko Programaren ohiko jardueren parte da.

Osasun agintarien arabera, esperientziak erakusten du azterketa horietako gehienetan emaitzak negatiboak direla eta emaitza positiboa duten kontaktuen artean gaixotasuna garatzeko arriskua oso txikia dela, profilaxi eta tratamendu oso eraginkorrak izanik, gainera.

Halaber, datozen asteetan zaintza aktibo eta zorrotza mantenduko da, EAEn indarrean dagoen tuberkulosi programaren jarraibideen arabera.

Arnas aparatuko tuberkulosia Mycobacterium tuberculosis bakterioak eragindako infekzio gaixotasuna da. Transmisioa gertatzeko, beharrezkoa da gaixotasun aktiboa duten pertsonen (forma pulmonarra dutenen) kontaktu estua eta iraunkorra. Gaixotasuna diagnostikatzen denean, tratamendua oso eraginkorra da eta guztiz sendatzea ahalbidetzen du, behar bezala jarraituz gero.

NEURRI PREBENTIBOA

Osasun Sailak eta Osakidetzak nabarmendu dute tuberkulosi kasuetarako protokoloa aktibatu izana neurri prebentibo hutsa dela, eta beharrezko neurriak martxan daudela unibertsitate komunitatearen eta, oro har, herritarren segurtasuna eta ongizatea bermatzeko.

Azkenik, iragarri dute informazioa eta jarraipena EHUko komunitateari eta herritarrei garaiz emango zaiela edozein berrikuntza esanguratsu. Gainera, Osakidetzako Osasun Aholku Zerbitzua ohiko telefonoetan egongo da eskura, gaixotasun honekin edo beste edozein osasun arazorekin lotutako zalantzak argitzeko.