Jaurlaritzak 750.000 euro bideratuko ditu osasun teknologian I+G+B sustatzeko laguntzetara

Eusko Jaurlaritzako Osasun Sailak 750.000 euro banatuko ditu osasun teknologiaren arloan I+G+B sustatzeko du laguntzetan, enpresen produktuak, teknologiak eta zerbitzuak garatzeko prozesua babesteko eta bizkortzeko asmoz, batez ere Euskadiko osasun sistemako ikerketa institutuetan haien baliozkotzea eta testatzea erraztuz, gobernu kontseiluak astearte honetan onartutako aginduaren arabera.

Jaurlaritzatik nabarmendu dutenez, euskal osasun sistemak funtsezko eginkizuna du enpresekin eta eragile zientifiko-teknologikoekin lankidetzan aritzeko, eta horrela, produktu berrien aholkularitza eta orientazioa, ideiak kontrastatzea, erronka kliniko berriak identifikatzea eta pazienteen artean osasun teknologiak baliozkotzeko eta testatzeko azterketa klinikoak egitea errazteko.

Zehazki, aste honetan onartutako Osasun Sailaren aginduan jasotako laguntzak Medtech ekimenaren barruan daude. Egitasmo horren helburua da Osasun Sistema Publikoak euskal enpresen berrikuntza babestea, osasun teknologiak baliozkotzeko eta erakusteko prozesuetan lagunduz.

Azken batean, enpresen eta osasuneko profesionalen arteko elkarrekintza sustatu nahi da, eta Euskadiko osasun sistemak enpresa ingurunerako proba banku gisa funtzionatzeko duen gaitasuna bultzatu, euskal enpresek nahitaez beste osasun sistema batzuetara jo behar izatea saihestuz.

Laguntzen deialdiak 750.000 euroko zuzkidura du, eta azterketa kliniko gisa kategorizatutako I+G+B proiektuak finantzatuko ditu, hainbat fasetan: ingurune klinikoko lehen kontzeptu probetan hasi, eta merkaturatu osteko jarraipen azterketaraino.

Euskadin I+G+Bko jarduera bat daramaten enpresen proiektuak izango dira onuradunak: mikroenpresak (mikroETE), enpresa txiki eta ertainak (ETE) eta enpresa handiak, baldin eta proiektu horiek Zientzia eta Teknologiaren Euskal Sareko eragileekin lankidetzan egiten badituzte.