hiru aste besterik ez dira falta ikasturtea amai-tzeko, eta guraso asko datorren urtean etorriko zaiguna pentsatzen ari gara dagoeneko. Eta ez naiz ari Haur Hezkuntzatik Lehen Hezkuntzara igarotzeak dakarren jauziaz, baizik eta askoz hutsalagoa den baina, aldi berean, egunerokoan bizirauteko orduan hil edo bizikoa den zerbaitez. Aspaldiko gai polemiko bati buruz ari naiz. Izan ere, eskola-uniformeak defendatzaile adina kontrario ditu. Eta asko, ni bezala, biak izan gara. Are gehiago, aitortu behar dut haurrei autonomia gehiago ematea bezalako argudioekin hura uxatzetik maitatzera igaro naizela, goizeko estresa arintzeko eta benetako eztabaidak eragin ditzaketen erabakiak sinplifikatzeko gai izateagatik. Duela hiru urtetik hona, alaba txikiak eta bere kideek txandal urdin bat jantzi dute, eta zer esanik, bizitza errazagoa egin zaigu eta urrea diren minutuak aurreztu dizkigu goizeko ordu batzuetan. Egia da oso polita ez dela, baina praktikoagoa ezin da izan. Datorren ikasturteari begira estrategia berri bat pentsatu behar da, goizak gure energiarekin bukatuko duten tira bira bihur ez daitezen. Neskatoa, bere aldetik, txandala gainetik kentzeko irrikan dago bere autonomia eta independentziari bide emateko, eta ni, aldiz, beldurrez dardarka.
