La Txama, Olaia Inziarte, PI L.T. eta Sua izango dira Aihotz plazan Gasteizko jaietan

La Txama, Olaia Inziarte, PI L.T. eta Sua izango dira Aihotz plazako agertokian abuztuaren 5tik 8ra bitartean 2026ko Gasteizko Andre Maria Zuriaren jaietan. Kontzertu guztiak 23:00etan hasiko dira, Gasteizko Udaletik jakinarazi dutenez.

Aihotz plazako kontzertuek hiriko musika proposamena osatu nahi dute jaietan. Estilo ez horren komertziala, alternatiboagoa, apurtzaileagoa eta, jakina, euskaldunagoa ekarri ohi dute, eta beste urte batez ziur nago plaza hau beteko dutela, nabarmendu du Sonia Diaz de Corcuera Kultura eta Hezkuntza zinegotziak.

La Txama taldeak abuztuaren 5ean joko du, Andre Maria Zuriaren egunean. Chill Mafia, Skakeitan edo Esne Beltza taldeetan jo izan duten kideek osatzen dute, eta corridoak eta rantxerak egungo oinarri elektronikoekin nahasten dituzte.

Abuztuaren 6an Olaia Inziarteren txanda izango da. Euskal musikagintzaren ahots gazte entzutetsuenetakoa da gaur egun. Izaroren azken birako kontzertuetan aurreko gonbidatua izan zen eta orain Aihotz plaza aukeratu du kontzertu oso berezia eskaintzeko. Emanaldi hori izango da uda honetan hiriburu handietan modu irekian eskainiko duen bakarra.

PI L.T. talde bizkaitarra abuztuaren 7an igoko da Aihotz plazako oholtzara. 1990eko hamarkadaren hasieran Mungian sortutako metal alternatiboko banda, zenbait geldialdi eta aldaketa batzuk egin ondoren itzuli da indarrarekin, melodiarekin, sendotasunarekin, eklektizismoarekin eta jakin-minarekin.

Azkenik, Sua Maruriko (Bizkaia) indie rock alternatiboko taldeak joko du abuztuaren 8an. Bide ilunek argitzen zuten dena izenburuko hirugarren lana aurkeztuko du, soinu rockeroagoarekin eta intentsitatez beteriko abestiekin. Emakumeen ahotsek osatutako laukotea erreferentziazko talde bihurtu da Euskal Herrian eta nazioartean, eta Alemanian, Japonian eta Hego Korean ere jo du.