La Mapatxaren 'Loreen hizkuntza' lanarekin hasiko da Gasteizko Udal Antzoki Sarearen neguko denboraldia

La Mapatxa Teatro euskal konpainiak hasiko du Gasteizko Udal Antzoki Sarearen neguko denboraldia ostegunean, abenduaren 18an, Jesus Ibañez de Matauco antzokian, 'Loreen hizkuntza' izenburuko bere lehen sorkuntza lanarekin.

Taldeko arduradunek astelehen honetan egindako aurkezpenean azaldu dutenez, Federico Garcia Lorcaren 'Doña Rosita la soltera o el lenguaje de las flores' obran jasota dauden itxaropenak dira lanaren abiapuntua.

Ikuskizunak XXI. mendeko maitasun harremanak jorratzen ditu, bai eta azken urteotan ligatzeko prozesua nola aldatu den ere, egoera askoren bidez, umorean oinarrituta. Horrela, lanaren protagonistak loreak dira.

Getari Etxegarai da obraren zuzendaria, eta dramaturgia Unai Izquierdorena da. Aktore lanak ere egiten dute biek, Olatz Ganboarekin eta Mikel Losadarekin batera. Ibon Belandiak konposatu eta interpretatutako zuzeneko musika izango du ikuskizunak, eta lanketa bisuala Ines Bermejok egin du.

BESTE ALBISTE BATZUK

TUVISAko Administrazio Kontseiluak ezohiko bilera egingo du ostegun honetan, María José Ajuriaguerra egungo gerentea gaitzesteko eta kargutik kentzeko eta gaur egun Mantentze Lanetako udal-zerbitzuko arduraduna den José Rico kargu horretarako izendatzeko proposamena aztertzeko. Izaskun Reyes presidenteak egin du proposamena, udal-sozietatearen egungo egoeraren eta lan-giroaren ebaluazioa egin ondoren. Izan ere, gatazka maila handia dagoela egiaztatu da.

Gerentziaren eta enpresa-batzordearen arteko komunikazio faltak eta horrek TUVISAren funtzionamendu normalizaturako beharrezkoak diren akordioak lortzeko garaian dakartzan ondorioek eragin dute garraio publikoko sozietatearen kudeaketako arduradunaren ordezkapen hori egiteko beharra.

Kargugabetzeko proposamenarekin batera, José Rico gerente berri izendatzea planteatu da. Mantentze Lanen Zerbitzuko egungo buruak, Ricok, urte askotako esperientzia du giza baliabideen eta administrazio-baliabideen kudeaketan, Udalaren kudeaketarako funtsezkoa den arloetan.