Gabriel Arestiren omenezko bi kontzertu antolatu ditu Euskaltzaindiak abendurako Bilbon

Euskaltzaindiak aurrera darrai Gabriel Aresti idazle eta euskaltzain urgazle bilbotarraren heriotzaren 50. urteurrena gogoratzeko ekitaldiekin, eta haren omenezko bi kontzertu antolatu ditu Bilbon, abenduaren 4an eta 10ean.

Ikuskizunak Euskaltzaindiaren egoitzan aurkeztu dira asteazken honetan, Bilbon, eta Isaac Amezaga Bizkaiko Foru Aldundiko Euskara zuzendari nagusiak, Carmen Martinez Guerra Bilboko Koral Elkarteko kudeatzaileak, Joxan Goikoetxea musikariak eta Andres Urrutia euskaltzainburuak parte hartu dute aurkezpenean.

Bada, azaldu dutenez, lehenengo kontzertua 'Gabriel Aresti Mug(H)arri' izango da, abenduaren 4an, BBK Salan, 19:00etan, Joxan Goikoetxea musikariak Aresti omentzeko beren-beregi sortua.

"Sorkuntza eszenikoan hitzen eta melodien arteko elkarrizketa garaikidea emango da, Gabrielen pentsamendua, estetika eta iruditeria ideologikoa biziberritzeko asmoz", aurreratu du musikari gipuzkoarrak.

Goikoetxeak EusKameratako kideak diren Beñat Egiarte, Amaia Azkue, Xabier de Felipe eta Xabi Payarekin batera jardungo du oholtza gainean.

KONTZERTUA

Bigarren kontzertua abenduaren 10ean izango da, Arriaga Antzokian, 19:30ean, eta euskal kantutegiko abesti ugari interpretatuko dira bertan, tartean, Arestik berak idatzitako batzuk. Oholtza gainean izango dira Jon Maia bertsolaria, Rafa Rueda musikaria eta Bilboko Koral Elkarteko Euskeria Abesbatza.

Maiak 'Nire aitaren etxean' inspiratutako bertsoa botako du eta Euskeria abesbatzak euskal kantutegiko abesti ezagunak interpretatuko ditu, hala nola 'Zeruan eder ilargia' (Aita Donostia), 'Maitia nun zira' (Jose Uruñuela), 'Aitarik ez dut' (Errobi) edo 'Lau teilatu' (Juan Carlos Perez).

Azkenik, Rafa Rueda musikariak Arestiren hitzekin eginiko lau kanta joko ditu: 'Preso gaudenon ahoetatik', 'Nire izena', 'Bilbaoko kaleak' eta 'Egia bat esateagatik'.