Vitoria-Gasteizko Udalak aste honetan hasiko ditu Judimendi parkearen birmoldaketa integrala egiteko lanak. Proiektua Viveros Eskalmendi SL enpresari esleitu diote eta 228.000 euroko inbertsioa eta lau hilabeteko epea izango du gauzatzeko.

Esku-hartze horrek auzoko bizilagunek behin eta berriz egindako eskaerari erantzuten dio, eta berdegune enblematiko horren erabilerak modernizatzea eta dibertsifikatzea du helburu. Aurrez ikusitako jarduketek irisgarritasuna hobetzea, jolasguneak handitzea eta txakurrentzako parke berri bat sortzea ahalbidetuko dute.

“Judimendik berritutako parkea izango du hilabete gutxi barru. Parke berria abegitsuagoa izango da eta auzoaren benetako beharretara egokituta egongo da. Auzokideen iritzia entzun nahi izan dugu, eta haien ekarpenak bizikidetza eta espazio publikoaren erabilera partekatua indartuko dituen diseinuan islatu nahi izan ditugu”, adierazi du Beatriz Artolazabal Espazio Publikoaren eta Auzoen zinegotziak.

Proiektuaren elementu berritzaileenetako bat txakurrentzat ‘agility’ motako eremua sortzea izango da. Gune hori gutxi gorabehera 600 metro koadroko lurzati berdean jarriko da eta, haren inguruan, hesia egongo da. Sarbide bikoitza izango du, eta pasabidea, tunelak, slaloma, plataformak eta tranpolina izango dituen zirkuitua ere prestatuko da. Altzari egokituak ere izango ditu: iturria, eserlekuak, paperontzi bereziak eta argiak.

“Txakurrentzako gune berri hau beren animaliak paseatzen dituztenentzat zein parkean bizikidetza hobetzeko pentsatuta dago. Horri esker, txakurrek askatasunean gozatu ahal izango dute, familientzako edo adinekoentzako eremuetan sartu gabe”, adierazi du Artolazabalek.

Txakur-parkeaz gain, proiektuak haurrentzako eremuak erabat berritzea aurrez ikusten du. Esku-hartzea bi eremutan egingo da.

  • Parkearen hegoaldeko muturrean, jolasgunea handituko da: diseinu naturalizatuagoa eta inklusiboagoa izango du, eta karrusel motako zabua, soka-dorrea, oreka-jolasak, habia-zabua eta 25 metroko tirolina izango ditu.
  • Taberna-kafetegiaren ondoan, haur txikienentzat bereziki diseinatutako bi jolas berri jarriko dira.

Bi eremuek zoladura berrituak (kautxua eta pinuaren azala), hiri-altzari berriak eta ureztatze-sarearen hobekuntzak izango dituzte. Gainera, hondatuta dagoen kautxua kenduko dute.

“Aste honetan hasiko dituzten lanak parke osoagoa izateko apustuarekin lotuta daude; bertan, pertsona bakoitzak bere lekua aurkituko du. Jolaserako, atsedenerako, paseorako eta topaketarako pentsatutako espazioa da. Hitz gutxitan esanda, hobekuntza nabarmena izango da auzoko bizi-kalitaterako”, amaitu du zinegotziak.