Europa Jauregiak entzumen- eta ikusmen-alarmako sistema izango du, dibertsitate funtzional sentsoriala duten pertsonen segurtasuna hobetzeko

Europa Biltzar Jauregiak bere instalazioen eta bertako ekitaldi ugarietara joandako pertsonen segurtasuna hobetu eta indartuko du, megafoniaren, ikusizko seinaleen edo ahots bidezko abisuen bidez sistema berri bat instalatuta. Horren guztiaren bidez, larrialdi-egoeratan dibertsitate funtzional sentsoriala duten pertsonen inklusioa hobetu ahal izango da.

“Barrutiko espazioetan, larrialdi-egoeretan megafonia bidezko abisuak eta ikusizko seinaleak igortzeko sistema jarriko da. Argi estroboskopikoa duten gailu optikoak izango dira, eta suteak detektatzeko instalazioari, alarmari eta alertari lotuta egongo dira, ikusizko edo idatzizko seinaleak interpretatzeko zailtasunak dituztenentzat, sistema inklusiboagoa eta ulergarriagoa eskainiz”, azaldu du Borja Rodríguez Hiri Ereduaren eta Hirigintzaren zinegotziak.

Ahots bidezko alarma-sistema Francisco de Vitoria aretoan edo Prado, Florida, Aiala, Salburua eta Zabalgana aretoetan ezarriko da, besteak beste. Elektronikoki biltegiratutako edo gainbegirale batek zuzenean igorritako mezu batzuk erabiltzen ditu sistemak, larrialdietan, suteetan edo bestelako gorabeheretan alarma igortzeko.

Mezuek argiak eta zehatzak, eta 30 segundotik beherakoak izan behar dute, eta mezu horiek igorri aurretik, seinale akustiko bat egingo da, bertan daudenen arreta erakartzeko.

Soinu-presioaren maila 65 dezibeliotik gorakoa izango da, eta giro-zarataren gainetik, 5 eta 20 dezibelio artekoa izan beharko du. Pleguak zehazten duenez, audio-kalitate handia izan behar dute, gaztelaniaz, euskaraz eta ingelesez, gutxienez.

Argiztapen estroboskopikoa biltzar-jauregi osoan ezarriko da, espazio zabal eta gardenetan kontsumo desberdineko bi gailu optikorekin, aldizkako distira laburrak eginez ebakuazio-guneetara zuzentzeko.

Horrelako instalazioak funtsezkoak dira jende asko biltzen den guneetan, hala nola Europa Jauregian. Eraikingintzaren Kode Teknikoak (EKT), gainera, 500 lagunetik gorako edukiera duten eraikinetan ahots bidezko larrialdi-sistema izateko betebeharra zehazten du.