Oinarrizko gizarte zerbitzuen dispositibo berezia Iparralde gizarte etxera lekualdatuko da abuztuan Gasteizen eta bertako langile kopurua bikoiztu egingo da. Kokaleku zentrikoagoa eta herritarrek ezagutzen dutena eskaintzea da helburua, irailera arte itxaron ezin duten behar sozialak dituzten familiei arreta hobea emateko. Gizarte Politiketako Saileko gainerako zerbitzuek normaltasunez funtzionatuko dute.
Gasteizko Udaletik jakinarazi dutenez, hiri osoan kokatutako oinarrizko gizarte zerbitzuek ez diete arretarik ematen abuztuan herritarrei, gizarte etxeen itxiera partzial edo osoaren eta profesionalen oporraldiaren ondorioz. Abuztuko dispositiboa Paula Montal kalean eskaini izan da lehenik, eta azken bost urteetan Ibaiondo gizarte etxean.
Oinarrizko gizarte zerbitzuek arreta eman diezaieketen familien gizarte arretari eustea da helburua, premia larriak baitituzte eta ezin baitute irailera arte itxaron.
"Aurten, abuztuaren 1etik 29ra bitartean, herritar guztientzat irisgarriagoa izango den leku bat eskainiko dugu, eta arretan bi langile gehiago egongo dira, eskaria handituko dela aurreikusita. Iparraldean eskaintzen den arreta urtean zehar oinarrizko edozein gizarte zerbitzutan ematen den berbera izango da", azaldu du Lucho Royero Gizarte Politiketako zinegotziak.
Oinarrizko gizarte zerbitzuek arreta eman diezaieketen familien gizarte arretari eustea da helburua, premia larriak baitituzte eta ezin baitute irailera arte itxaron
Abuztuan lan egingo duten langileetako batzuk Iparralden izango dira, eta gainerakoek erreferentziazko oinarrizko gizarte zerbitzuan jarraituko dute, barneko lanak eginez, gizarte etxeak jendearentzat itxita egongo baitira. Halere, une jakin batean behar izanez gero, arreta indartu ahal izango dute dispositibo berezian, non arduradun bat, sei gizarte langile, bi psikologo eta hiru administrari egongo diren.
