GASTEIZ
Un árbol cae y destroza un coche en Arana
Gasteiz Euskararen Hiria ekimena bigarren aldiz ospatuko da irailean, 'Gastehiz herritik euskararen hirira' lelopean
Jai izaera izango duen jardunaldiak bi ordu luzatu du programazioa
Gasteiz Euskararen Hiria ekimenaren bigarren edizioa egingo da irailaren 13an 'Gastehiz herritik euskararen hirira. 1.000 urte lotzen gaituen haria' lelopean, eta adin guztiei zuzendutako euskarazko ekitaldien egitaraua izango du Andre Maria Zuriaren plazan eta Plaza Berrian. Udal gobernuaren eta EH Bilduren aurrekontu akordioaren barruan dago ekimena.
Maria Nanclares Gasteizko Udaleko Euskara zinegotziak, Maider Uriarte EH Bilduko zinegotziak eta Uxue Alonso GEU elkarteko koordinatzaileak eman dituzte ekimenaren xehetasunak astearte honetan egindako prentsaurrekoan.
Jakinarazi dutenez, 'Gastehiz' toponimoa lehen aldiz Donemiliagan agertu zenetik igaro diren 1.000 urteei egindako keinua da aurtengo leloa. Arabako herri horretako monasterioari zergak ordaintzen zizkioten 307 herrixken izena jasotzen zuen dokumentu batean agertu zen toponimoa lehen aldiz.
Jai izaera izango duen jardunaldiak bi ordu luzatu du programazioa, eta haurrei, gazteei, helduei eta famili osoari zuzendutako 14 orduko euskarazko jardueren egitaraua izango du.
GEU Elkarteak antolatu du egitaraua eta 11:00etan hasiko da. Goizean zehar, Andre Maria Zuriaren plazako eta Plaza Berriko programazioaren protagonistak haurrak eta familiak izango dira.
Eguerditik aurrera, programazioa Andre Maria Zuriaren plazan zentratuko da eta publiko orokorragora zabalduko da, beste proposamen askoren artean kontzertu akustikoak eta 'drag show'-ak barne hartuko dituen kultur eskaintza anitzarekin. Gainera, hiriko ostalaritza lokalek parte hartu ahal izango duten eskaintza gastronomikoa ere izango da.
EKIMENAREN HELBURUA
Nanclaresek azaldu duenez, ekimenaren helburua "euskarari eta normalizazioaren alde egunero lan egiten dutenei balioa ematea da. Horregatik, euskaraz hitz egiten dutenei, euskaraz ikasten ari direnei edo, besterik gabe, partaide sentitu eta jai giroaz gozatu nahi dutenei zuzenduta daude jarduerak".
"Bigarren edizio honekin ekimena egonkortzea dugu helburu. Izan ere, Gasteizen euskara goraka doa, euskal kulturaren eskutik"
Bestalde, Uriartek nabarmendu du du Gasteiz Euskararen Hiria udalerriko agendan leku bat egitea lortu duen ekimena dela. "Hiri mailako ekimen izatera zuzenduta dagoen proiektua" dela esan du, eta urte guztian zehar euskal komunitateak egiten duen lana erdigunean jartzeko "aukera bikaina".
"Bigarren edizio honekin ekimena egonkortzea dugu helburu. Izan ere, Gasteizen euskara goraka doa, euskal kulturaren eskutik. Euskararen kontrako oldarraldiaren aurrean, euskaraz bizitzeko eskubidea aldarrikatzeko beharra agerikoa da. Eskubide linguistikoen urraketa etengabeen aurrean, euskarak, gure hizkuntzak, merezi duen tokia hartu behar du, esparru guztietan. Euskara ez baita baztertzailea, euskarak batu egiten du", azaldu du.